Հայաստանի Մ16 հավաքականը հաղթեց Մոլդովային և դուրս եկավ Եվրոբասկետի եզրափակիչ

Բասկետբոլի Հայաստանի Մ16 հավաքականը դուրս եկավ Երևանում անցկացվող Եվրոպայի 2026 թվականի առաջնության C դիվիզիոնի եզրափակիչ։

Կիսաեզրափակիչ խաղում Հայաստանի հավաքականը 82։66 հաշվով հաղթեց Մոլդովայի ընտրանուն։

Հանդիպման ամենաարդյունավետ խաղացողը դարձավ Էնթոնի Սարգսյանը։ Հայաստանի հավաքականի բասկետբոլիստը տպավորիչ դաբլ-դաբլ գրանցեց՝ վաստակելով 26 միավոր և կատարելով 26 անդրադարձ։ Նա նաև իր հաշվին գրանցեց մեկ արդյունավետ փոխանցում և մեկ խլում։

Դմիտրի Հայյանը վաստակեց 17 միավոր, իսկ Իթան Լեոնարդո Կազանջյանը՝ 15 միավոր և յոթ արդյունավետ փոխանցում։ Դաբլ-դաբլ ձևակերպեց նաև Միխայիլ Պետրովը՝ գրանցելով 11 միավոր և 15 անդրադարձ։ Նա նաև կատարեց հինգ արդյունավետ փոխանցում և չորս խլում։

Եզրափակիչում Հայաստանի հավաքականը կհանդիպի Կոսովո — Մալթա երկրորդ կիսաեզրափակիչ հանդիպման հաղթողի հետ։ Մրցաշարի վճռորոշ հանդիպումը կկայանա հուլիսի 12-ին։