Հայաստանի թենիսի հավաքականն ավարտեց ելույթը Դևիսի գավաթում՝ Ծաղկաձորում

Հայաստանի թենիսի տղամարդկանց հավաքականը Դևիսի գավաթի 4-րդ խմբում իր ելույթն ավարտեց Մալթայի հավաքականից կրած պարտությամբ։ Տնային մրցաշարն անցկացվեց Ծաղկաձորում։

Վերջին տուրում Հայաստանի հավաքականը Մալթային զիջեց 0:3 հաշվով։ Սակայն այս պարտությունը չխանգարեց Հայաստանի հավաքականին հասնել գլխավոր նպատակին՝ բարձրանալ ավելի ուժեղ խումբ։

Մրցաշարի արդյունքներով Հայաստանը խմբում զբաղեցրեց երկրորդ տեղը և իրավունք ստացավ 2027 թվականին հանդես գալ Դևիսի գավաթի Europe Group III-ում։

Մալթայի դեմ խաղում Սամվել Աղայանը պարտվեց Լիամ Դելիկատային՝ 1:6, 1:6 հաշվով։ Դավիթ Պողոսյանը զիջեց Ալեքս Դե Գաբրիելեին՝ 0:6, 3:6։ Զուգախաղում Միքայել Ավանեսյանն ու Ավետիք Ղազարյանը երեք սեթում պարտվեցին Մեթյու Ասցիակին և Էվան Գալեային՝ 6:7, 7:6, 2:6։

Հայաստանի հավաքականը մրցաշարն ավարտեց չորս հաղթանակով և մեկ պարտությամբ։ Ավելի վաղ հայ թենիսիստները հաղթել էին Իսլանդիայի, Ալբանիայի, Անդորրայի և Սան Մարինոյի հավաքականներին։

Առաջին տեղը զբաղեցրեց Մալթան, որը հաղթեց բոլոր հինգ խաղերում։ Հայաստանը զբաղեցրեց երկրորդ տեղը՝ 4 հաղթանակ և 1 պարտություն ցուցանիշով։ Ընդ որում, տնային մրցաշարում Հայաստանի հավաքականի կազմում հանդես եկան չորս թենիսիստներ, և նրանցից յուրաքանչյուրը 18 տարեկան է։

Այսպիսով, 2027 թվականին Հայաստանի թենիսի տղամարդկանց հավաքականը հանդես կգա Դևիսի գավաթի ավելի ուժեղ դիվիզիոնում՝ Europe Group III-ում։