Հայաստանի բասկետբոլի հավաքականը Լոս Անջելեսում հաղթեց Իռլանդիային

Հայաստանի բասկետբոլի տղամարդկանց հավաքականը ընկերական խաղում հաղթանակ տարավ Իռլանդիայի հավաքականի նկատմամբ՝ Los Angeles International Basketball Classic մրցաշարի շրջանակում։

Հանդիպումը կայացավ Լոս Անջելեսում և ավարտվեց Հայաստանի ընտրանու հաղթանակով՝ 74:59 հաշվով։

Հայաստանը վստահ մեկնարկեց խաղում և առաջին քառորդում հաղթեց 23:20 հաշվով։ Առաջին կեսում պայքարը բավական հավասար էր, սակայն Հայաստանի հավաքականը կարողացավ պահել առավելությունը։ Վճռորոշ դարձավ վերջին քառորդը, որտեղ հայ բասկետբոլիստները մրցակցին թույլ տվեցին վաստակել ընդամենը 9 միավոր և խաղը հասցրին հաղթական ավարտի։

Հայաստանի հավաքականի կազմում ամենաարդյունավետը Քրիս Միտչելն էր, որը վաստակեց 16 միավոր։ Արտեմ Տավակալյանը ավելացրեց 14 միավոր, Յուրա Մելիքյանը՝ 13, իսկ Անդրե Սփայթ-Մկրտչյանը վաստակեց 10 միավոր և կատարեց 6 արդյունավետ փոխանցում։

Իռլանդիայի կազմում լավագույնը Շոն Ֆլադն էր՝ 18 միավորով։

Հայաստանը առավելություն ունեցավ հարձակման անդրադարձերում՝ 12-ը 10-ի դիմաց, կատարեց 16 արդյունավետ փոխանցում և 36 միավոր վաստակեց երեքվայրկյանանոց գոտուց։ Բացի այդ, Հայաստանի հավաքականն ավելի լավ օգտվեց մրցակցի սխալներից՝ Իռլանդիայի կորուստներից հետո վաստակելով 17 միավոր։

Հայաստան — Իռլանդիա՝ 74:59
Ըստ քառորդների՝ 23:20, 16:15, 18:15, 17:9։