Հայաստանի հավաքականը հայտնել է Դևիսի գավաթի տնային մրցաշարի կազմը

Հայտնի է դարձել թենիսի Հայաստանի տղամարդկանց հավաքականի կազմը Դևիսի գավաթի IV խմբի հանդիպումների համար, որոնք կանցկացվեն Ծաղկաձորում։

Տնային մրցաշարը կկայանա հունիսի 16-ից 20-ը։ Հայաստանը վերջին 18 տարվա ընթացքում առաջին անգամ կընդունի Դևիսի գավաթի հանդիպումներ, ինչը կարևոր իրադարձություն է հայկական թենիսի համար։

Հայաստանի հավաքականի կազմում ընդգրկվել են վեց թենիսիստներ.

Միքայել Ավանեսյան, 18 տարեկան — ITF 849
Հենրիկ Նիկողոսյան, 38 տարեկան
Ավետիք Ղազարյան, 18 տարեկան
Միքայել Ավետիսյան, 30 տարեկան
Դավիթ Պողոսյան, 18 տարեկան — ITF 1644
Սամվել Աղայան, 18 տարեկան — ITF 2274

Ծաղկաձորում կայանալիք մրցաշարին կմասնակցեն նաև Ալբանիայի, Անդորրայի, Իսլանդիայի, Լիխտենշտեյնի, Մալթայի և Սան Մարինոյի ազգային հավաքականները։ Թիմերը կպայքարեն դասով բարձրանալու և Դևիսի գավաթի III խումբ տեղափոխվելու համար։

Հայաստանի հավաքականի համար առաջիկա մրցաշարը կլինի ավելի բարձր մակարդակ վերադառնալու հնարավորություն։ 2025 թվականին հայկական թիմը հանդես էր գալիս III խմբում, սակայն զբաղեցրել էր վերջին տեղը և նահանջել IV խումբ։

Նշենք, որ Հայաստանի հավաքականի հայտացուցակում ընդգրկված են միանգամից մի քանի երիտասարդ թենիսիստներ։ Թիմի չորս խաղացող 18 տարեկան են, և տնային մրցաշարը կարող է նրանց համար կարևոր փուլ դառնալ կարիերայում։