Հայաստանի կառավարությունը Կապանի քաղաքային մարզադաշտը ճանաչել է հանրային գերակա շահի օբյեկտ

Հայաստանի կառավարությունը որոշում է կայացրել Կապանի քաղաքային մարզադաշտը ճանաչել հանրային գերակա շահի օբյեկտ։ Սա ճանապարհ է բացում ժամանակակից բազմաֆունկցիոնալ մարզահամալիրի կառուցման պետական լայնածավալ ծրագրի իրականացման համար։

Համալիրի շինարարությունը կիրականացվի պետության միջոցներով։ Նոր մարզական ենթակառուցվածքը կկառուցվի ժամանակակից չափանիշներին համապատասխան։

Նախագիծը նախատեսում է պայմաններ ստեղծել ոչ միայն ֆուտբոլային հանդիպումների անցկացման, այլև աթլետիկայի զարգացման համար։ Համալիրում կկառուցվեն վազքուղիներ, ցատկերի սեկտորներ և մարզումների համար անհրաժեշտ այլ ենթակառուցվածքներ։

Առանձնահատուկ ուշադրություն կդարձվի ֆուտբոլային ենթակառուցվածքին։ Նախատեսվում է, որ նոր մարզադաշտը կհամապատասխանի ՈՒԵՖԱ-ի չափանիշներին, ինչը հնարավորություն կտա այնտեղ անցկացնել միջազգային հանդիպումներ և բարձր մակարդակի այլ մրցումներ։

Ծրագրի իրականացումը կարևոր քայլ կլինի Սյունիքի մարզի մարզական ենթակառուցվածքների զարգացման գործում՝ ստեղծելով նոր հնարավորություններ մարզիկների պատրաստման, ինչպես նաև ազգային և միջազգային մրցաշարերի անցկացման համար։