Պաշտոնական․ Պաբլո Գարսիան «Նոայի» նոր գլխավոր մարզիչն է

Հայկական «Նոան» հայտարարել է Պաբլո Գարսիային թիմի գլխավոր մարզչի պաշտոնում նշանակելու մասին։ 49-ամյա ուրուգվայցի մասնագետը պայմանագիր է ստորագրել ակումբի հետ։

Գարսիան մարզչական կարիերան սկսել է հունական ՊԱՕԿ-ի համակարգում, որտեղ աշխատել է ինչպես երիտասարդական, այնպես էլ հիմնական թիմի հետ։ Նրա գլխավորությամբ ՊԱՕԿ-ի Մ19 թիմը երեք մրցաշրջան անընդմեջ դարձել է Հունաստանի չեմպիոն, իսկ 2020/21 մրցաշրջանում Գարսիան հիմնական թիմին առաջնորդել է Հունաստանի գավաթի հաղթանակի։

Հետագայում մասնագետը գլխավորել է հունական «Պանսերրաիկոսն» ու «Ատրոմիտոսը», իսկ նախորդ մրցաշրջանն անցկացրել է կիպրական ԱՊՕԵԼ-ի գլխավոր մարզչի պաշտոնում։

Պաբլո Գարսիան ֆուտբոլասերներին լավ հայտնի է նաև իր խաղային կարիերայով։ Նախկին կիսապաշտպանը հանդես է եկել Մադրիդի «Ռեալում», «Միլանում», «Օսասունայում», «Սելտայում» և եվրոպական մի շարք այլ ակումբներում։ Միջազգային մակարդակում Գարսիան պաշտպանել է Ուրուգվայի հավաքականի գույները։

Այժմ ուրուգվայցի մասնագետը մարզչական կարիերան կշարունակի Հայաստանում՝ գլխավորելով «Նոան»։ Այս պաշտոնում նա փոխարինել է խորվաթ Սանդրո Պերկովիչին։