Մբապեն դուբլի հեղինակ դարձավ և Ֆրանսիային հաղթանակ բերեց Սենեգալի նկատմամբ ԱԱ-2026-ում
- Հեղինակ: Vahe Hakobyan
- Sportaran
Ֆրանսիայի հավաքականը հաջող մեկնարկեց 2026 թվականի աշխարհի առաջնությունում։ I խմբի առաջին տուրի խաղում Դիդիե Դեշամի թիմը 3:1 հաշվով հաղթեց Սենեգալի հավաքականին։
Առաջին խաղակեսը ֆրանսիացիների համար հեշտ չստացվեց։ Սենեգալը գործում էր կազմակերպված, արագ անցնում էր հակագրոհների և մի քանի անգամ կարող էր բացել հաշիվը։ Սակայն ընդմիջումից հետո Ֆրանսիան զգալիորեն ավելացրեց արագությունն ու հարձակողական գործողությունների որակը։
Հանդիպման գլխավոր հերոսը դարձավ Կիլիան Մբապեն։ 66-րդ րոպեին Ֆրանսիայի հավաքականի ավագը բացեց հաշիվը Մայքլ Օլիսեի փոխանցումից հետո, որը շատ վառ հանդիպում անցկացրեց։ 82-րդ րոպեին ֆրանսիացիների առավելությունը կրկնապատկեց ՊՍԺ-ի ֆուտբոլիստ Բրեդլի Բարկոլան։
Վերջնամասում Սենեգալը կարողացավ վերադառնալ խաղի մեջ․ 90+5-րդ րոպեին աչքի ընկավ Իբրահիմ Մբայեն, որը նույնպես հանդես է գալիս ՊՍԺ-ում։ Սակայն ինտրիգը երկար չպահպանվեց։ Արդեն մեկ րոպե անց Մբապեն հեռահար հարվածով ձևակերպեց դուբլը և հաստատեց վերջնական հաշիվը՝ 3:1։
Այդ գոլը Մբապեի համար պատմական էր․ հարձակվողը շրջանցեց Օլիվիե Ժիրուին և դարձավ Ֆրանսիայի հավաքականի պատմության լավագույն ռմբարկուն։ Ֆրանսիան մրցաշարը սկսում է կարևոր հաղթանակով և անմիջապես գլխավորում է I խումբը, որտեղ նաև հանդես են գալիս Նորվեգիայի և Իրաքի հավաքականները։