Մարտին Պողոսյանը դարձավ Եվրոպայի Մ23 առաջնության փոխչեմպիոն, Աննա Ամրոյանը բրոնզե մեդալ նվաճեց պոկում վարժությունում

Հայ ծանրորդները շարունակում են համալրել Հայաստանի հավաքականի մեդալների հավաքածուն Ալբանիայի Դուրես քաղաքում ընթացող ծանրամարտի Եվրոպայի երիտասարդների և մինչև 23 տարեկանների 2026 թվականի առաջնությունում։ Հերթական մեդալները նվաճել են Մարտին Պողոսյանը (85 կգ) և Աննա Ամրոյանը (77 կգ)։ Սակայն Ամրոյանը վնասվածքի պատճառով ստիպված է եղել ժամանակից շուտ ավարտել մրցելույթը։

Մարտին Պողոսյանը Եվրոպայի Մ23 առաջնության 85 կգ քաշային կարգում նվաճել է արծաթե մեդալ՝ երկամարտի արդյունքում գրանցելով 343 կգ։

Պոկում վարժությունում հայ ծանրորդը հաջողությամբ բարձրացրել է 149 և 153 կգ, սակայն երրորդ մոտեցմամբ չի կարողացել հաղթահարել 156 կգ ծանրությունը։ Արդյունքում Պողոսյանն այս վարժությունում զբաղեցրել է հինգերորդ տեղը։

Հրում վարժությունում նրա ելույթն ավելի հաջող է ստացվել։ Պողոսյանը հաջորդաբար բարձրացրել է 186 և 190 կգ՝ նվաճելով փոքր արծաթե մեդալ։ Երկամարտի 343 կգ արդյունքը նրան թույլ է տվել զբաղեցնել երկրորդ տեղը և դառնալ Եվրոպայի մինչև 23 տարեկանների փոխչեմպիոն։

Աննա Ամրոյանը 77 կգ քաշային կարգի պոկում վարժությունում նվաճել է փոքր բրոնզե մեդալ, սակայն չի կարողացել ավարտին հասցնել մրցելույթը։

Առաջին անհաջող մոտեցումից հետո հայ ծանրորդուհին բարձրացրել է 98 կգ, ապա արդյունքը բարելավել՝ հասցնելով 102 կգ-ի։ Այդ ցուցանիշը բավարար է եղել վարժությունում երրորդ տեղը զբաղեցնելու համար։

Ցավոք, հրում վարժության հենց առաջին մոտեցման ժամանակ Ամրոյանը վնասվածք է ստացել և ստիպված է եղել հրաժարվել հետագա պայքարից։ Հայաստանի ծանրամարտի ֆեդերացիայի տեղեկություններով՝ վնասվածքը լուրջ չէ։

Նույն՝ 77 կգ քաշային կարգում Հայաստանի մյուս ներկայացուցիչը՝ Ալինա Սուքիասյանը, կանգ է առել մրցանակային եռյակից մեկ քայլ հեռու՝ երկամարտի արդյունքում զբաղեցնելով չորրորդ տեղը։

Պոկում վարժությունում Սուքիասյանը բարձրացրել է 98 և 101 կգ՝ գրանցելով չորրորդ արդյունքը։ Հրում վարժությունում նրան հաջողվել է բարձրացնել 120 կգ, սակայն 125 կգ ծանրությունը հաղթահարելու փորձերը ձախողվել են։ Այս վարժությունում հայ մարզուհին զբաղեցրել է հինգերորդ տեղը։

Երկամարտի 221 կգ (101+120) արդյունքով Սուքիասյանն ավարտել է մրցելույթը չորրորդ հորիզոնականում։

Այսպիսով, Հայաստանի հավաքականը շարունակում է հաջող ելույթները ծանրամարտի Եվրոպայի երիտասարդների և մինչև 23 տարեկանների առաջնությունում՝ մեդալներ նվաճելով ինչպես առանձին վարժություններում, այնպես էլ երկամարտում։