Լեգենդար վոլեյբոլիստ Նինա Մուրադյանը այցելեց Երևանում կայացած մինչև 16 տարեկանների Եվրոպայի առաջնությանը
- Հեղինակ: Vahe Hakobyan
- Sportaran
Երևանում ավարտվեց մինչև 16 տարեկանների վոլեյբոլի Եվրոպայի առաջնությունը, որի պատվավոր հյուրերից մեկն էլ դարձավ տաղանդավոր մարզիկուհի Նինա Մուրադյանը։ Օլիմպիական մրցանակակիրն ու Եվրոպայի և ԽՍՀՄ բազմակի չեմպիոնը մրցաշարի խաղերից հետո անձամբ պարգևատրեց օրվա լավագույն խաղացողներին՝ յուրահատուկ պահեր պարգևելով երիտասարդ մասնակիցներին։
Նինա Մուրադյանը խորհրդային և եվրոպական սպորտի ամենատիտղոսակիր վոլեյբոլիստներից մեկն է։ 1976 թվականին նա նվաճեց օլիմպիական խաղերի արծաթե մեդալ, 1977-ին դարձավ Եվրոպայի չեմպիոն, երկու անգամ հաղթեց ԽՍՀՄ առաջնությունում, իսկ ավելի ուշ՝ Գերմանիայի առաջնությունում։ Մուրադյանը իր կարիերան սկսել է երևանյան «Բուրևեստնիկ» ակումբում և 1974-1982 թվականներին հանդես է եկել մոսկովյան «Դինամո»-ի կազմում։
1987 թվականին տեղափոխվելով Գերմանիայի Դաշնային Հանրապետություն՝ նա Գերմանիայի ազգային հավաքականում հանդես եկավ Զավացկի ազգանունով։ 1990-2003 թվականներին մարզել է Գերմանիայի կանանց երիտասարդական հավաքականը, իսկ 2003-2007 թվականներին՝ տղամարդկանց երիտասարդական հավաքականը։ Այսօր լեգենդար վոլեյբոլիստը շարունակում է կիսվել իր փորձով՝ աշխատելով Ավստրիայում։
Նինա Մուրադյանի ներկայությունը Երևանում կայացած առաջնությունում դարձավ սերունդների կապի խորհրդանիշ և վառ օրինակ այն երիտասարդ վոլեյբոլիստների համար, ովքեր երազում են մեծ սպորտային հաղթանակների մասին։