Քիթ Կրիկորյանը ռևանշի հասավ Լենդոն Էլմորի նկատմամբ UFC BJJ 8 մրցաշարում

Հայ գրեփլեր Քիթ Կրիկորյանը հաջող ելույթ ունեցավ Լաս Վեգասում կայացած UFC BJJ 8 մրցաշարում։ Փետուր քաշային կարգում Կրիկորյանը միաձայն որոշմամբ հաղթեց 19-ամյա Լենդոն Էլմորին և ռևանշի հասավ նախորդ պարտության համար։

Կրիկորյանի համար սա վերադարձ էր UFC BJJ Bowl՝ սերիայի առաջին մրցաշարից հետո։ Հայ մարզիկը մենամարտին մոտեցել էր UFC BJJ-ում 1-0 արդյունքով, իսկ այս հաղթանակից հետո բարելավեց իր ցուցանիշը՝ դարձնելով այն 2-0։

Գոտեմարտը սկսվեց փոքր դադարով՝ Էլմորի աչքին պատահական հարվածից հետո, սակայն պայքարի վերսկսումից անմիջապես հետո Կրիկորյանը սկսեց պարտադրել իր մարտավարությունը։ Առաջին ռաունդի միջնամասում նա անցկացրեց հաջող անցում մեկ ոտքի վրա, իսկ քիչ անց կրկին գետնին տեղափոխեց մրցակցին՝ այս անգամ հզոր երկոտանի անցումով։

Էլմորը փորձում էր պատասխանել ոտքերի վրա հարձակումներով և մի քանի անգամ փորձեց դուրս գալ ցավեցնող հնարքի, սակայն Կրիկորյանը գրագետ պաշտպանվում էր, պահպանում վերին դիրքը և չէր թույլ տալիս մրցակցին զարգացնել վտանգավոր դրվագները։

Երկրորդ ռաունդում հայ գրեփլերը կրկին արագ тейքդաուն կատարեց և շարունակեց ճնշում գործադրել վերևից։ Էլմորը ակտիվորեն աշխատում էր ոտքերով և փորձում էր սպառնալիք ստեղծել տարբեր բռնումներով ու «եռանկյունի» խեղդող հնարքով, սակայն Կրիկորյանը վստահորեն չեզոքացրեց այդ փորձերը։ Ռաունդի վերջնամասում նա զբաղեցրեց «հյուսիս-հարավ» դիրքը, ապա անցավ կողային վերահսկողության՝ շարունակելով վերահսկել գոտեմարտի ընթացքը։

Վերջին ռաունդում պայքարը գրեթե անմիջապես տեղափոխվեց պարտեր։ Էլմորը փորձում էր գործել մեջքի վրայից, սակայն Կրիկորյանը պահպանում էր ճնշումը, փոխում դիրքերը և մրցակցին տարածք չէր տալիս հարձակումների համար։ Թեև հայ մարզիկին չհաջողվեց ավարտել մենամարտը ժամանակից շուտ, նրա վերահսկողությունն ու ակտիվությունը ամբողջ հանդիպման ընթացքում վճռորոշ եղան։

Երեք ռաունդների արդյունքներով բոլոր մրցավարները հաղթանակը շնորհեցին Քիթ Կրիկորյանին։ Այսպիսով, հայ ներկայացուցիչը տարավ իր երկրորդ հաղթանակը UFC BJJ-ում և կարևոր քայլ կատարեց սերիայում ավելի մեծ մենամարտերի ճանապարհին։