Կառլեն Հովհաննիսյանը ներկայացվել է «Ակրոնում» և պատրաստ է նորամուտը նշել թիմի կազմում

Ռուսաստանի գավաթի՝ Մոսկվայի «Լոկոմոտիվի» դեմ խաղից առաջ «Ակրոնը» պաշտոնապես ներկայացրել է թիմի նորեկին՝ Հայաստանի հավաքականի կիսապաշտպան Կառլեն Հովհաննիսյանին։

21-ամյա ֆուտբոլիստը նոր թիմում ստացել է 6 համարի մարզաշապիկը։ Հովհաննիսյանը նաև ընդգրկվել է «Ակրոնի» հայտացուցակում «Լոկոմոտիվի» դեմ հանդիպման համար և կարող է հենց այս խաղում նորամուտը նշել Տոլյատիի ակումբի կազմում։

Ներկայացման ժամանակ հայ կիսապաշտպանը դիմել է «Ակրոնի» երկրպագուներին։

— Ողջույն, կարմիր-սևեր։ Ես արդեն այստեղ եմ։ Կհանդիպենք խաղադաշտում, — ասել է Հովհաննիսյանը։

Արդեն հանդիպման ընթացքում Կառլենը հարցազրույց է տվել հեռուստաալիքին և հայտարարել, որ լիովին պատրաստ է դուրս գալ խաղադաշտ, եթե մարզչական շտաբը նրան նման հնարավորություն տա։

— Ես պատրաստ եմ ցանկացած պահի դուրս գալ խաղադաշտ, եթե մարզիչը խնդրի։ Ինձ համար հարմար են «վեցյակի» և «ութնյակի» դիրքերը՝ հենակետային կիսապաշտպան և box-to-box կիսապաշտպան, — նշել է ֆուտբոլիստը։

Հովհաննիսյանը նաև դրական է գնահատել իր նոր թիմի խաղը։

— «Ակրոնը» լավ թիմ է։ Այսօր լավ խաղ են ցուցադրում, — հավելել է կիսապաշտպանը։

Սեպտեմբերի 1-ի առավոտյան «Ակրոնը» պաշտոնապես հայտարարել էր Հովհաննիսյանի՝ Երևանի «Փյունիկից» տեղափոխության մասին։ Ֆուտբոլիստը ռուսական ակումբի հետ կնքել է հինգ տարվա պայմանագիր։