Էդուարդ Սպերցյանը գոլի հեղինակ դարձավ «Ալ-Ահլիի» ջախջախիչ հաղթանակում «Ալ-Ռիյադի» նկատմամբ

Հայաստանի ազգային հավաքականի կիսապաշտպան Էդուարդ Սպերցյանը գոլ խփեց Սաուդյան Արաբիայի Պրո լիգայի 5-րդ տուրի խաղում, որտեղ «Ալ-Ահլին» սեփական հարկի տակ 5:0 հաշվով առավելության հասավ «Ալ-Ռիյադի» նկատմամբ։

Պրո լիգայում կրած երկու անընդմեջ պարտություններից հետո «Ալ-Ահլիին» անհրաժեշտ էր հաղթանակ, և թիմը վստահորեն լուծեց այդ խնդիրը։ Հաշիվը 16-րդ րոպեին 11-մետրանոցից բացեց Այվան Թոունին, իսկ 43-րդ րոպեին Սպերցյանը գեղեցիկ հարվածով օդից կրկնապատկեց իր թիմի առավելությունը։ Առաջին խաղակեսի վերջնամասում Ֆրանսիշկու Տրինկաուն խփեց երրորդ գոլը։

Երկրորդ խաղակեսում Թոունին կրկին անվրեպ իրացրեց 11-մետրանոցը՝ ձևակերպելով դուբլը, իսկ 87-րդ րոպեին Նաիֆ Մասուդը սահմանեց հանդիպման վերջնական հաշիվը՝ 5:0։

Այս հաղթանակը կարևոր էր «Ալ-Ահլիի» համար, քանի որ թիմը հանդիպումից առաջ հրաժեշտ էր տվել մարզական տնօրեն Ռույ Պեդրուին և ձգտում էր դուրս գալ ճգնաժամային շրջանից։

Սպերցյանի համար սա դարձավ երկրորդ գոլը Սաուդյան Արաբիայի առաջնությունում և երրորդը բոլոր մրցաշարերում ընթացիկ մրցաշրջանում։ Բացի այդ, նրա հաշվին արդեն կա 3 գոլային փոխանցում՝ անցկացրած 7 խաղում։

Էդուարդ Սպերցյանի վիճակագրությունը «Ալ-Ռիյադի» դեմ խաղում.

• Խաղաժամանակ՝ 75 րոպե
• Գոլեր՝ 1
• Հարվածներ՝ 1
• Ճշգրիտ փոխանցումներ՝ 20 (74%)
• xA՝ 0.15
• Հաջող դրիբլինգ՝ 1/1
• Գնդակի հեռացումներ՝ 1
• Արգելափակված հարվածներ՝ 1
• Մենապայքարներ՝ 1/2
• SofaScore-ի գնահատական՝ 8.3՝