Էդուարդ Սպերցյանը չորրորդ անգամ անընդմեջ ճանաչվել է ՌՊԼ-ի մրցաշրջանի լավագույն կիսապաշտպան

Հայաստանի հավաքականի կիսապաշտպան Էդուարդ Սպերցյանը ճանաչվել է Ռուսաստանի Պրեմիեր լիգայի 2025/26 մրցաշրջանի լավագույն կիսապաշտպան։

Սպերցյանը չորրորդ անգամ անընդմեջ դարձել է «ՌՊԼ-ի հերոսներ» մրցանակաբաշխության հաղթող այս անվանակարգում։ Մրցանակի ստեղծումից հետո՝ 2023, 2024, 2025 և 2026 թվականներին, լավագույն կիսապաշտպան միշտ ճանաչվել է հենց Էդուարդ Սպերցյանը։

Հայաստանի հավաքականի ավագի համար սա վերջին մրցաշրջանն էր ՌՊԼ-ում։ Հաջորդ մրցաշրջանում նա այլևս չի հանդես գա Ռուսաստանի առաջնությունում, և այս մրցանակը նոր դափնեկիր կունենա։

2025/26 մրցաշրջանում Սպերցյանը դարձավ ՌՊԼ-ի լավագույն ասիստենտը՝ կատարելով 16 գոլային փոխանցում։ Բացի այդ, նա խփեց նաև 13 գոլ։

Մրցաշրջանի ավարտից հետո Սպերցյանը «Կրասնոդարից» տեղափոխվեց սաուդյան «Ալ-Ահլի»։

ՌՊԼ-ի մրցաշրջանի լավագույն ֆուտբոլիստ երկրորդ տարին անընդմեջ ճանաչվել է «Կրասնոդարի» հարձակվող Ջոն Կորդոբան։