Էդուարդ Սպերցյանը կնորամուտի ՖԻՖԱ-ի Միջմայրցամաքային գավաթում. «Ալ-Ահլիի» ճանապարհը կարող է հասցնել ՊՍԺ-ի հետ եզրափակիչ

Հայ կիսապաշտպան Էդուարդ Սպերցյանը օգոստոսի 26-ին կարող է անցկացնել իր առաջին հանդիպումը ՖԻՖԱ-ի Միջմայրցամաքային գավաթում։ Սաուդյան «Ալ-Ահլի» ակումբը գավաթի համար պայքարը կսկսի սեփական հարկի տակ՝ Նոր Զելանդիայի «Օքլենդի» դեմ հանդիպումով։

Խաղը կկայանա Ջիդդայում՝ King Abdullah Sports City մարզադաշտում։ Սպերցյանի համար սա կլինի ևս մեկ նորամուտ՝ «Կրասնոդարից» «Ալ-Ահլի» ամառային տեղափոխությունից հետո։ Հուլիսին սաուդյան ակումբը կիսապաշտպանի հետ կնքեց չորս տարվա պայմանագիր։

Ի՞նչ է իրենից ներկայացնում ՖԻՖԱ-ի Միջմայրցամաքային գավաթը

ՖԻՖԱ-ի Միջմայրցամաքային գավաթը ամենամյա ակումբային մրցաշար է, որին մասնակցում են ՖԻՖԱ-ի բոլոր վեց կոնֆեդերացիաների գլխավոր մրցաշարերի հաղթողները։

2026 թվականին կկայանա նորացված ձևաչափով մրցաշարի երրորդ խաղարկությունը։ Մասնակիցների մեծ մասը պետք է հաղթահարի փլեյ-օֆի մի քանի փուլ, մինչդեռ ՈՒԵՖԱ-ի Չեմպիոնների լիգայի գործող հաղթողն անմիջապես եզրափակչի ուղեգիր է ստանում։

Այս մրցաշրջանում այդ իրավունքը ստացել է ՊՍԺ-ն, որը երկրորդ տարին անընդմեջ դարձել է Չեմպիոնների լիգայի հաղթող։

Սպերցյանի առաջին մրցակիցը՝ Օվկիանիայի և A-League-ի չեմպիոնը

«Ալ-Ահլիի» առաջին արգելքը կլինի նորզելանդական «Օքլենդը»։ Մայիսին ակումբը հաղթեց պատմության մեջ առաջին OFC Pro League-ը և ՖԻՖԱ-ի Միջմայրցամաքային գավաթի ուղեգիր նվաճեց։

Միաժամանակ «Օքլենդը» հանդես է գալիս Ավստրալիայի A-League-ում և մրցաշարի գործող չեմպիոնն է։ 2025/26 մրցաշրջանի եզրափակչում նորզելանդացիները 1:0 հաշվով հաղթեցին «Սիդնեյին»։

«Օքլենդի» կազմում կա նաև հայ երկրպագուներին ծանոթ ֆուտբոլիստ՝ նորզելանդացի հարձակվող Լոգան Ռոջերսոնը։ 2024 թվականի առաջին կեսին նա հանդես էր գալիս Երևանի «Նոայի» կազմում, որից հետո վերադարձավ հայրենիք և միացավ «Օքլենդին»։

Ի՞նչ է սպասվում «Ալ-Ահլիին» հաղթանակի դեպքում

Եթե Սպերցյանի թիմը հաղթահարի «Օքլենդի» արգելքը, հաջորդ մրցակիցը կլինի Աֆրիկայի չեմպիոն՝ հարավաֆրիկյան «Մամելոդի Սանդաունսը»։

Մայիսին «Սանդաունսը» իր պատմության մեջ երկրորդ անգամ հաղթեց CAF Չեմպիոնների լիգան՝ եզրափակչում երկու հանդիպումների արդյունքում 2:1 հաշվով առավելության հասնելով մարոկկոյական «ԱՍ ՖԱՐ»-ի նկատմամբ։

«Մամելոդի Սանդաունսի» և «Ալ-Ահլի» — «Օքլենդ» զույգի հաղթողի հանդիպումը նախատեսված է սեպտեմբերի 19-ին Պրետորիայում։ Այդ խաղի հաղթողը կնվաճի ՖԻՖԱ-ի Աֆրիկա-Ասիա-Խաղաղօվկիանոսյան գավաթը և կշարունակի պայքարը գլխավոր տիտղոսի համար։

«Տոլուկան», Հարավային Ամերիկայի չեմպիոնը և ՊՍԺ տանող ճանապարհը

Զուգահեռաբար կորոշվի մրցաշարի ամերիկյան հատվածի հաղթողը։

Մեքսիկական «Տոլուկան», որը հաղթել է Concacaf Champions Cup 2026-ը, կհանդիպի Լիբերտադորեսի գավաթի հաղթողի հետ։ Հարավային Ամերիկայի չեմպիոնն այս պահին դեռ որոշված չէ։

Այդ դիմակայության հաղթողն այնուհետև կհանդիպի մրցաշարի աֆրիկա-ասիա-խաղաղօվկիանոսյան հատվածի ուժեղագույն թիմի հետ՝ ՖԻՖԱ-ի Challenger Cup-ի համար խաղում։

Եվ միայն Challenger Cup-ի հաղթողը գլխավոր՝ ՖԻՖԱ-ի Միջմայրցամաքային գավաթի եզրափակչի ուղեգիր կստանա, որտեղ նրան արդեն կսպասի ՊՍԺ-ն։

Սպերցյանն ընդդեմ Սաֆոնովի՝ եզրափակչո՞ւմ

Էդուարդ Սպերցյանի համար հնարավոր եզրափակիչը կարող է առանձնահատուկ սյուժե ունենալ։

ՊՍԺ-ի կազմում շարունակում է հանդես գալ Մատվեյ Սաֆոնովը՝ «Կրասնոդարում» Սպերցյանի նախկին թիմակիցը։ Ավելին՝ ռուս դարպասապահն արդեն հասցրել է դառնալ Միջմայրցամաքային գավաթի գլխավոր հերոսներից մեկը։ 2025 թվականի մրցաշարի եզրափակչում՝ «Ֆլամենգոյի» դեմ խաղում, Սաֆոնովը 11-մետրանոցների շարքում հետ մղեց չորս հարված և օգնեց փարիզյան թիմին նվաճել գավաթը։

2026 թվականի մայիսին ՊՍԺ-ն նաև երկրորդ տարին անընդմեջ հաղթեց Չեմպիոնների լիգան՝ 1:1 հաշվով ավարտված խաղից հետո 11-մետրանոցների շարքում պարտության մատնելով «Արսենալին»։ Այդ եզրափակչում ևս փարիզյան ակումբի դարպասը պաշտպանում էր Սաֆոնովը։

Այսպիսով, եթե «Ալ-Ահլին» հաղթահարի մրցաշարային ամբողջ ճանապարհը, Սպերցյանը ՖԻՖԱ-ի Միջմայրցամաքային գավաթի եզրափակչում կարող է հանդիպել իր նախկին թիմակցին։

Սակայն ՊՍԺ-ի հետ հնարավոր հանդիպմանը դեռ երեք քայլ կա։ Դրանցից առաջինը Էդուարդ Սպերցյանի թիմը պետք է կատարի արդեն օգոստոսի 26-ին՝ «Օքլենդի» դեմ խաղում։

ՖԻՖԱ-ի Միջմայրցամաքային գավաթ 2026-ի եզրափակչի հստակ ամսաթիվն ու անցկացման վայրը դեռ չեն հայտարարվել։