Ավելի քան 25 մլն դրամ կհատկացվի Երևանում Ստեփան Սարգսյանի հուշամրցաշարի անցկացմանը
- Հեղինակ: Vahe Hakobyan
- Sportaran
Հայաստանի կառավարությունը Հայաստանի ըմբշամարտի ֆեդերացիային կհատկացնի ավելի քան 25 միլիոն դրամ՝ 2026 թվականի Ստեփան Սարգսյանի անվան ազատ ոճի ըմբշամարտի 26-րդ միջազգային մրցաշարի կազմակերպման և անցկացման համար։ Մրցումները կանցկացվեն Երևանում սեպտեմբերի 10-ից 13-ը։
Մրցաշարը նվիրված է ԽՍՀՄ սպորտի վաստակավոր վարպետ, Օլիմպիական խաղերի արծաթե մեդալակիր և Եվրոպայի չեմպիոն Ստեփան Սարգսյանին։
Մրցաշարի համար նախատեսված է դրամական մրցանակային ֆոնդ։ Յուրաքանչյուր քաշային կարգում հաղթողները կստանան 2000-ական դոլար, արծաթե մեդալակիրները՝ 1000-ական դոլար, իսկ բրոնզե մեդալակիրները՝ 500-ական դոլար։
Սպասվում է, որ մրցաշարին կմասնակցի 181 մարզիկ՝ 15 երկրից։
Ավելի վաղ հայտնի էր դարձել ԱՄՆ հավաքականի կազմը, որը կմասնակցի Երևանում կայանալիք մրցաշարին։
Ստեփան Սարգսյանի հուշամրցաշարը Հայաստանում անցկացվող ըմբշամարտի միակ մրցաշարն է, որն ընդգրկված է Ըմբշամարտի միացյալ աշխարհի (UWW) պաշտոնական օրացույցում։