Երևանում Չեռնոգորիայի հաղթական գոլի հեղինակը բաց կթողնի Հայաստանի դեմ պատասխան խաղը

Չեռնոգորիայի հավաքականի կիսապաշտպան Ալեքսա Լատկովիչը որակազրկման պատճառով չի կարող մասնակցել Ազգերի լիգայի չորրորդ տուրի՝ Հայաստանի դեմ հանդիպմանը։

25-ամյա ֆուտբոլիստը մրցաշարի նախորդ երկու հանդիպումներում երկու դեղին քարտ է ստացել և այժմ բաց կթողնի հոկտեմբերի 5-ին Պոդգորիցայում կայանալիք խաղը Հայաստանի հավաքականի դեմ։

Լատկովիչն առաջին զգուշացումը ստացել է սեպտեմբերի 28-ին Երևանում՝ Հայաստանի դեմ խաղում։ Նույն հանդիպման վերջնամասում կիսապաշտպանը դարձավ գլխավոր հերոսներից մեկը. երկրորդ խաղակեսում փոխարինման դուրս գալուց հետո նա 89-րդ րոպեին խփեց հաղթական գոլը և Չեռնոգորիային պարգևեց 3:2 հաշվով հաղթանակ։

Երկրորդ դեղին քարտը Լատկովիչը ստացել է հոկտեմբերի 2-ին՝ Լատվիայի դեմ արտագնա հանդիպման ժամանակ։ Չեռնոգորիայի հավաքականը հաղթեց 2:1 հաշվով՝ Վասիլիե Աջիչի դուբլի շնորհիվ և Ազգերի լիգայի ընթացիկ խաղարկությունում տարավ երրորդ անընդմեջ հաղթանակը։

Այսպիսով, Հայաստանի դեմ պատասխան խաղում Չեռնոգորիայի գլխավոր մարզիչ Միրկո Վուչինիչը չի կարողանա հույս դնել երևանյան հանդիպման հաղթական գոլի հեղինակի վրա։

Չեռնոգորիա — Հայաստան հանդիպումը կկայանա հոկտեմբերի 5-ին Պոդգորիցայի քաղաքային մարզադաշտում։ Խաղի մեկնարկը՝ Երևանի ժամանակով 22:45-ին։

Երեք տուրից հետո Չեռնոգորիան առավելագույն 9 միավորով գլխավորում է C2 խումբը։ Հայաստանի հավաքականը վաստակել է 3 միավոր և զբաղեցնում է երրորդ տեղը։