Տաշքենդում անցկացվող մրցաշարում Հայաստանի մինչև 20 տարեկանների հավաքականը հետխաղյա 11 մետրանոց հարվածաշարում հաղթեց Ռուսաստանին
- Հեղինակ: Vahe Hakobyan
- Sportaran
Հայաստանի Մ20 երիտասարդական հավաքականը առաջին հաղթանակը տարավ Միրաբրոր Ուսմանովի հիշատակին նվիրված միջազգային մրցաշարում, որն անցկացվում է Տաշքենդում։
Երկրորդ տուրում Միշա Ջորկաեֆի թիմը հանդիպեց Ռուսաստանի Մ20 հավաքականի հետ։ Հանդիպման հիմնական ժամանակն ավարտվեց առանց գոլերի՝ 0:0։
Խաղը շատ լարված և կոշտ ստացվեց։ Երկու թիմերի ֆուտբոլիստները հաճախ էին խախտում կանոնները, մրցավարը բազմիցս քարտեր էր ցույց տալիս, իսկ խաղացողների միջև մի քանի անգամ հուզական բախումներ տեղի ունեցան։
Գոլազուրկ ոչ-ոքիից հետո հաղթողը որոշվեց 11-մետրանոցների շարքում, որտեղ ավելի դիպուկ գտնվեցին հայ ֆուտբոլիստները՝ 5:3։
11-մետրանոցների շարքը հիշվեց նաև անսովոր դրվագով։ Ռուսաստանի հավաքականի ֆուտբոլիստներից մեկի հարվածի ժամանակ 11-մետրանոցի նշակետի հատվածում խոտածածկի վրա մեծ փոս առաջացավ։ Դաշտի վնասվածքի պատճառով կազմակերպիչները ստիպված եղան շարքը շարունակել մյուս դարպասի մոտ։
Հայաստանի հավաքականի համար սա առաջին հաղթանակն էր մրցաշարում։ Մեկնարկային խաղում հայկական թիմը խոշոր հաշվով պարտվել էր մրցաշարի տանտեր Ուզբեկստանի հավաքականին՝ 1:5։
Մրցաշարի վերջին հանդիպումը Միշա Ջորկաեֆի թիմը կանցկացնի հոկտեմբերի 6-ին Սաուդյան Արաբիայի դեմ։