Հայաստանը հաղթեց Իսլանդիային և երրորդ հաղթանակը տարավ Դևիսի գավաթում

Հայաստանի թենիսի տղամարդկանց հավաքականը կարևորագույն հաղթանակ տարավ Դևիսի գավաթի Եվրոպական գոտու IV խմբի երրորդ տուրում։ Մրցաշարն անցկացվում է Ծաղկաձորում։

Հայաստանի հավաքականը 2:1 հաշվով հաղթեց Իսլանդիայի թիմին, որը դասակարգը բարձրացնելու պայքարում գլխավոր մրցակիցներից մեկն է։

Առաջին հանդիպումը շատ լարված ընթացք ունեցավ։ Դավիթ Պողոսյանը առաջին սեթում թայ-բրեյքում պարտվեց Ռաֆն Բոնիֆացիուսին՝ 6:7, սակայն հետո վստահ վերադարձավ խաղ, երկրորդ սեթում հաղթեց 6:3 հաշվով, իսկ երրորդ պարտիայում առաջ էր 4:1 հաշվով, ինչից հետո մրցակիցը չկարողացավ շարունակել հանդիպումը։

Երկրորդ մենախաղում Միքայել Ավանեսյանը պարտվեց Էգիլ Սիգուրդսոնին՝ 3:6, 2:6, և դիմակայության ելքը որոշվեց զուգախաղում։

Հայաստանի վճռորոշ հաղթանակը բերեցին Սամվել Աղայանը և Դավիթ Պողոսյանը։ Հայկական զույգը 7:6, 6:3 հաշվով հաղթեց Էգիլ Սիգուրդսոն / Վլադիմիր Ռիստիչ զույգին և ապահովեց Հայաստանի հավաքականի երրորդ անընդմեջ հաղթանակը մրցաշարում։

Առանձին պետք է նշել, որ այս մրցաշարում Հայաստանի հավաքականի բոլոր մասնակիցները 18-ամյա թենիսիստներ են։

Հաջորդ հանդիպումը Հայաստանը կանցկացնի հունիսի 19-ին՝ Ալբանիայի դեմ։ Մինչ այդ Վահե Ավետիսյանի թիմը հաղթել էր Անդորրային և Սան Մարինոյին։

Աղյուսակը 3-րդ տուրից հետո

Մալթա — 3 հաղթանակ
Հայաստան — 3
Իսլանդիա — 2
Անդորրա — 1
Սան Մարինո — 0
Ալբանիա — 0

Հիշեցնենք, որ Հայաստանի կանանց հավաքականն այս օրերին Սան Մարինոյում հանդես է գալիս Բիլի Ջին Քինգի գավաթի 3-րդ խմբում։