Արման Ադամյանը Բաքվում ընթացող ձյուդոյի աշխարհի առաջնությունում հաղթել է Ադրբեջանի օլիմպիական չեմպիոնին

Ռուսաստանը ներկայացնող հայազգի ձյուդոիստ Արման Ադամյանը տպավորիչ հաղթանակ է տարել Բաքվում ընթացող ձյուդոյի 2026 թվականի աշխարհի առաջնությունում։

Մինչև 100 կգ քաշային կարգի 1/8 եզրափակչում 29-ամյա մարզիկը հանդիպել է Ադրբեջանի ներկայացուցիչ Զելիմ Կոցոևի՝ Փարիզի 2024 թվականի Օլիմպիական խաղերի չեմպիոնի հետ։

Լարված գոտեմարտի հիմնական ժամանակում հաղթողը չի որոշվել, և պայքարը տեղափոխվել է լրացուցիչ ժամանակ (Golden Score)։ Վճռորոշ պահին Ադամյանը կարողացել է վաստակել «յուկո» գնահատականը և հաղթանակ տանել օլիմպիական չեմպիոնի նկատմամբ։

Այսպիսով, Կոցոևն իր ելույթն ավարտել է հայրենիքում անցկացվող աշխարհի առաջնության 1/8 եզրափակչում։

Օլիմպիական չեմպիոնին հաղթելուց հետո Ադամյանը շարունակել է հաջող մրցելույթները Բաքվում։ Քառորդ եզրափակչում հայազգի ձյուդոիստը պարտության է մատնել Կանադայի ներկայացուցչին և դուրս եկել աշխարհի առաջնության կիսաեզրափակիչ։

Նշենք, որ Ադամյանը 2023 թվականի աշխարհի չեմպիոն է։ Այդ տարի նա Դոհայում ոսկե մեդալ էր նվաճել՝ նույնպես հանդես գալով մինչև 100 կգ քաշային կարգում։

Հիշեցնենք, որ Բաքվում ընթացող աշխարհի առաջնությանը մասնակցել է նաև հայազգի մեկ այլ ձյուդոիստ՝ Շվեդիան ներկայացնող Նարեկ Վարդանյանը։ Մինչև 73 կգ քաշային կարգում նա հաղթել է Թուրքիայի ներկայացուցչին, սակայն մեդալների համար պայքարն ավարտել է 1/8 եզրափակչում։