«Դեպորտիվո Արմենիոն» առաջին հաղթանակը տարավ Հայաստանի քարտեզով նոր համազգեստով
Արգենտինական «Դեպորտիվո Արմենիո» ֆուտբոլային ակումբը Բուենոս Այրեսից վստահ հաղթանակ տարավ Արգենտինայի երրորդ դիվիզիոնի՝ Պրիմերա Բ-ի առաջնության առաջին խաղում։ «Դեպորտիվո Մերլո»-ի հետ հանդիպումն ավարտվեց 3:0 հաշվով՝ հայ համայնքի թիմի օգտին։
«Դեպորտիվո Արմենիո» - «Դեպորտիվո Մերլո» 3:0
Այս հանդիպումը ոչ միայն հաջող մեկնարկ դարձավ թիմի համար, այլև նոր խաղային համազգեստի առաջին ներկայացումը։ Ակումբը նախօրեին հրապարակել էր նոր համազգեստը, որի վրա պատկերված է Հայաստանի քարտեզը՝ իր բոլոր շրջաններով։ Սա ընդգծում է ակումբի ազգային ինքնությունը և կապը հայկական արմատների հետ։
«Դեպորտիվո Արմենիո»-ի մամուլի ծառայությունը հատուկ տեսանյութով ներկայացրել է նոր համազգեստը, որը մեծ հետաքրքրություն է առաջացրել երկրպագուների շրջանում։ Վերջին տարիներին ակումբը մշտապես թողարկում է ազգային մոտիվներով յուրօրինակ համազգեստներ։ Օրինակ, անցած մրցաշրջանում թիմը հանդես էր գալիս հայկական այբուբենով զարդարված մարզաշապիկներով։