Հայաստանի կանանց Մ-19 հավաքականը իմացավ իր մրցակիցներին Եվրո-2026/27-ի որակավորման փուլում

Շվեյցարիայի Նիոն քաղաքում կայացել է կանանց Մ-19 Եվրոպայի առաջնության 2026/27 մրցաշրջանի որակավորման առաջին փուլի վիճակահանությունը։

Վիճակահանության արդյունքում Հայաստանի կանանց մինչև 19 տարեկանների հավաքականն ընդգրկվել է B լիգայի B2 խմբում։ Հայկական թիմի մրցակիցները կլինեն Իռլանդիայի, Բուլղարիայի և Վրաստանի հավաքականները։

Առաջին փուլի հանդիպումները կանցկացվեն մինի-մրցաշարերի ձևաչափով՝ մեկ երկրում։ B լիգայում հանդես կգա 24 հավաքական, որոնք բաժանված են 6 խմբի՝ յուրաքանչյուրում 4 թիմ։ Խմբերի հաղթողները, ինչպես նաև երկրորդ տեղ զբաղեցրած լավագույն թիմը, կբարձրանան A լիգա և պայքարը կշարունակեն որակավորման երկրորդ փուլում։

A լիգայում կմասնակցի 28 հավաքական՝ բաժանված 7 խմբի։ Իրենց խմբերում վերջին՝ չորրորդ տեղը զբաղեցրած թիմերը կնահանջեն B լիգա։

Կանանց Մ-19 Եվրոպայի առաջնության 2026/27 մրցաշրջանի եզրափակիչ փուլը կանցկացվի Հունգարիայում։