Վահե Գևորգյան. «Եթե “Ալաշկերտը” չուժեղանա, մենք անելիք չունենք եվրագավաթներում»

«Ալաշկերտի» գլխավոր մարզիչ Վահե Գևորգյանը մեկնաբանել է թիմի՝ եվրագավաթների ուղեգիր նվաճելը Հայաստանի Պրեմիեր լիգայի վերջին տուրում «Շիրակի» նկատմամբ տարած հաղթանակից հետո։

Մրցաշրջանի վերջին խաղում «Ալաշկերտը» 2:0 հաշվով հաղթեց «Շիրակին» և նվաճեց Կոնֆերենցիաների լիգայի որակավորման փուլի ուղեգիր։ Խաղից հետո Գևորգյանը նշեց, որ միջազգային ասպարեզում արժանապատիվ հանդես գալու համար ակումբին անհրաժեշտ է կազմի ուժեղացում։

«Ես ասում եմ և՛ հրապարակային, և՛ մեր ակումբի ներսում. եթե թիմը չուժեղանա, մենք անելիք չունենք եվրագավաթներում։ Իսկ եթե մինչ այդ հեռանան նաև առաջատարները, ապա ես պատրաստ չեմ աշխատել նման պայմաններում։ Մենք առաջին հերթին ներկայացնում ենք երկիրն ու ժողովրդին», — հայտարարել է «Ալաշկերտի» գլխավոր մարզիչը։

Գևորգյանը ընդգծել է, որ հասկանում է ակումբի ընտրած ռազմավարությունը՝ զարգացնել երիտասարդ ֆուտբոլիստներին և հետագայում նրանց ավելի թանկ վաճառել։ Սակայն, մարզչի խոսքով, այդ ճանապարհը պետք է ուղեկցվի խաղացողներին փոխարինելու հստակ մեխանիզմով։

«Ես ընդունում եմ ակումբի ընտրած ճանապարհը, որը ցանկանում է վերցնել երիտասարդ ֆուտբոլիստների և նրանց ավելի թանկ վաճառել։ Բայց պետք է լինի մեխանիզմ. պետք է հասկանալ՝ երբ և ում վաճառել։ Պետք է, որ վաճառքից մի քանի օր անց նրա փոխարեն նոր ֆուտբոլիստ գա։ Բատիոնոյի հետ կապված իրավիճակի նման բան չպետք է լինի», — նշել է մասնագետը։

Մարզիչը նաև վստահություն է հայտնել ակումբի ղեկավարությանը և առանձին հիշատակել մարզական տնօրեն Տիգրան Մկրտչյանին՝ ընդգծելով նրա ամբիցիաները։

«Ես վստահում եմ Տիգրան Մկրտչյանին և գիտեմ, որ նա նույնպես ամբիցիոզ մարդ է։ Այդ պատճառով այս պահին կասկած չունեմ այն ամենի վերաբերյալ, ինչ ասել եմ», — հավելել է Գևորգյանը։

«Ալաշկերտի» գլխավոր մարզչի խոսքով՝ թիմի մի շարք առաջատարներ առաջարկներ են ունեցել դեռ նախորդ ամռանը և ձմռանը, սակայն ֆուտբոլիստները մնացել են ակումբում։ Միևնույն ժամանակ Գևորգյանը նշել է, որ չէր ցանկանա տեսնել առանցքային խաղացողների տեղափոխությունը հայկական այլ ակումբներ։

«Չեմ ցանկանում վաճառել խաղացողներին հայկական այլ ակումբներ, քանի որ որպես մարզիչ չեմ ուզում ուժեղացնել մրցակիցներին։ Բացի այդ, հայկական ակումբները պատրաստ չեն վճարել այնքան, որքան եվրոպականները։ Բայց եթե երբևէ լինի լավ առաջարկ, և խաղացողը ցանկանա տեղափոխվել այնտեղ, մենք կքննարկենք», — ասել է գլխավոր մարզիչը։

Այսպիսով, չնայած մրցաշրջանի հաջող ավարտին և Կոնֆերենցիաների լիգայի ուղեգիր նվաճելուն, «Ալաշկերտի» առջև կարևոր խնդիր է դրված՝ պահպանել առաջատարներին և որակապես ուժեղացնել կազմը եվրագավաթային մրցաշրջանի մեկնարկից առաջ։

«Ալաշկերտը» վերջին անգամ եվրագավաթներում հանդես է եկել 2023/24 մրցաշրջանում, երբ կանգ առավ Կոնֆերենցիաների լիգայի որակավորման երկրորդ փուլում։ Իսկ 2021/22 մրցաշրջանում «Ալաշկերտը» դարձավ հայկական առաջին թիմը, որը դուրս եկավ Կոնֆերենցիաների լիգայի խմբային փուլ։