ՀՖՖ-ում կանոնադրական փոփոխություններ են նախապատրաստվում, որոնք կարող են Դենիս Ջորկաեֆի համար ճանապարհ բացել դեպի նախագահի պաշտոն

Հայաստանի ֆուտբոլի ֆեդերացիայում (ՀՖՖ) նախապատրաստվում են կանոնադրական կարևոր փոփոխություններ՝ ղեկավար մարմինների առաջիկա ընտրություններին ընդառաջ։ Ֆեդերացիայի 34 անդամներից 29-ը հանդես են եկել արտահերթ ժողով հրավիրելու նախաձեռնությամբ։ Առաջարկվող փոփոխությունները նախատեսում են վերացնել ՀՖՖ Գործադիր կոմիտեի անդամության թեկնածուների նկատմամբ գործող որոշ պահանջներ, ինչը կարող է Դենիս Ջորկաեֆի համար ճանապարհ բացել դեպի հայկական ֆուտբոլի ղեկավարություն։

Ինչպես հայտնում է ՀՖՖ մամուլի ծառայությունը, համապատասխան դիմումը ներկայացվել է հոկտեմբերի 16-ին՝ ֆեդերացիայի կանոնադրության 34-րդ և 35-րդ հոդվածների հիման վրա։ Արտահերթ ժողովի հիմնական նպատակն է քննարկել գործող կանոնադրության փոփոխությունների և լրացումների առաջարկները։

Ի՞նչ փոփոխություններ են առաջարկվում ՀՖՖ կանոնադրությունում

Առաջին փոփոխությունը վերաբերում է կանոնադրության 31-րդ հոդվածին, որը սահմանում է ֆեդերացիայի Գործադիր կոմիտեի անդամության թեկնածուներին ներկայացվող պահանջները։

Գործող կանոնակարգի համաձայն՝ Գործկոմի անդամության թեկնածուն, ի թիվս այլ պայմանների, պետք է վերջին մեկ տարվա ընթացքում մշտապես բնակված լինի Հայաստանի Հանրապետությունում և տիրապետի հայերենին։

Այժմ առաջարկվում է ամբողջությամբ վերացնել այս երկու պահանջները։ Միևնույն ժամանակ պահպանվում են մյուս երկու պայմանները․ թեկնածուն պետք է ունենա Հայաստանի Հանրապետության քաղաքացիություն և լինի առնվազն 25 տարեկան։

Այսպիսով, փոփոխությունների ընդունման դեպքում Գործադիր կոմիտեի անդամ կարող են դառնալ նաև արտերկրում մշտապես բնակվող և հայերենին չտիրապետող Հայաստանի քաղաքացիները։

Երկրորդ փոփոխությունը վերաբերում է կանոնադրության 38-րդ հոդվածին և ղեկավար պաշտոններում պաշտոնավարման ժամկետների հաշվարկման կարգին։

Գործող կանոնադրության համաձայն՝ նույնիսկ եթե անձը համապատասխան պաշտոնը զբաղեցրել է ընդամենը մի քանի ամիս, այդ ժամանակահատվածը հաշվարկվում է որպես մեկ ամբողջական քառամյա ժամկետ։

Նոր խմբագրությամբ առաջարկվում է այլ մոտեցում.

• Եթե անձը պաշտոնավարել է երկու տարուց պակաս, այդ ժամանակահատվածը չի հաշվարկվի որպես մեկ ամբողջական ժամկետ։

• Եթե պաշտոնավարման տևողությունը կազմել է երկու տարի կամ ավելի, այն կհաշվարկվի որպես մեկ ամբողջական ժամկետ։

Փոփոխությունները կարող են կապված լինել Դենիս Ջորկաեֆի թեկնածության հետ

Առանձնահատուկ ուշադրություն է գրավում հայերենին տիրապետելու և Հայաստանում մշտապես բնակվելու պարտադիր պահանջները վերացնելու առաջարկը։

Ավելի վաղ Sportaran-ը հաղորդել էր, որ Հայաստանի ֆուտբոլի ֆեդերացիայի նախագահի հնարավոր թեկնածուներից մեկը հայկական ծագումով ֆրանսիացի հասարակական գործիչ Դենիս Ջորկաեֆն է՝ 1998 թվականի աշխարհի չեմպիոն Յուրի Ջորկաեֆի ավագ եղբայրը։

Հոկտեմբերի 8-ին «Հրապարակ» օրաթերթը տեղեկություն էր հրապարակել, ըստ որի՝ Ջորկաեֆի թեկնածությունը դիտարկվում է որպես ՀՖՖ գործող նախագահ Արմեն Մելիքբեկյանին հնարավոր փոխարինող։

Միաժամանակ պարբերականը նշել էր, որ Ջորկաեֆի համար խոչընդոտներից մեկը հայերենին չտիրապետելն է։

Այժմ ֆեդերացիայի անդամներն առաջարկում են վերացնել հենց այդ պահանջը, ինչպես նաև վերջին մեկ տարվա ընթացքում Հայաստանում մշտապես բնակվելու պայմանը։

Այսպիսով, առաջարկվող փոփոխությունները կարող են վերացնել Ջորկաեֆի՝ ՀՖՖ ղեկավար մարմիններում ընդգրկվելու երկու հնարավոր խոչընդոտները։ Փոփոխությունների բովանդակության և նրա հնարավոր նշանակման մասին ավելի վաղ հրապարակված տեղեկությունների համընկնումը հատուկ ուշադրություն է գրավում, թեև այս նախաձեռնությունների և Ջորկաեֆի թեկնածության միջև կապը պաշտոնապես հաստատված չէ։

Հարկ է նաև հաշվի առնել, որ փոփոխություններն անմիջականորեն վերաբերում են Գործադիր կոմիտեի անդամության թեկնածուներին։ Դրանց ընդունումն ինքնին չի նշանակում, որ Ջորկաեֆն ավտոմատ կերպով հնարավորություն կստանա մասնակցելու նախագահի ընտրություններին․ դրա համար անհրաժեշտ է համապատասխանել տվյալ պաշտոնի համար սահմանված բոլոր պահանջներին։

Հիշեցնենք, որ Դենիս Ջորկաեֆը Հայաստանի պատվավոր հյուպատոսն է Ֆրանսիայում, զբաղեցնում է ֆրանսիական Դեսին-Շարպիո քաղաքի փոխքաղաքապետի պաշտոնը և նախկինում աշխատել է որպես ՀՖՖ նախագահի խորհրդական։

Հայաստանի ֆուտբոլի ֆեդերացիայի ղեկավարության առաջիկա ընտրությունները սպասվում են 2026 թվականի դեկտեմբերին։ Գործող նախագահ Արմեն Մելիքբեկյանն ավելի վաղ հայտարարել էր, որ չի պատրաստվում առաջադրվել նոր ժամկետով։

ՀՖՖ-ից հայտնել են, որ արտահերթ ժողով հրավիրելու ընթացակարգի մանրամասները, այդ թվում՝ անցկացման օրը, կհրապարակվեն ավելի ուշ։ Առայժմ խոսքը միայն առաջարկվող փոփոխությունների մասին է, և դրանց հաստատման վերաբերյալ վերջնական որոշում դեռ չի կայացվել։