Տուլիպան՝ «Շեմրոք Ռովերսի» նկատմամբ հաղթանակից հետո. «Ես կնախընտրեի ոչ-ոքին և առողջ Կամոյին»

«Արարատ-Արմենիայի» գլխավոր մարզիչ Մանուել Տուլիպան մեկնաբանել է իռլանդական «Շեմրոք Ռովերսի» նկատմամբ հաղթանակը Չեմպիոնների լիգայի 2026/27 մրցաշրջանի որակավորման երկրորդ փուլի առաջին խաղում։ Հայաստանի չեմպիոնը հաղթել է 2:0 հաշվով՝ երկրորդ խաղակեսում Սանդրո Լիմայի և Զիդան Բանժակիի խփած գոլերի շնորհիվ։

Պորտուգալացի մասնագետը պատմել է մարտավարական վերադասավորումների, Փոլ Այոնգոյի անսովոր դիրքի, վնասվածք ստացած ֆուտբոլիստների վիճակի և պատասխան հանդիպման նախապատրաստության մասին։ Պատասխան խաղը կկայանա հուլիսի 28-ին՝ Դուբլինում։

Մանուել Տուլիպայի մամուլի ասուլիսը «Շեմրոք Ռովերսի» դեմ խաղից հետո

— «Արարատ-Արմենիան» Չեմպիոնների լիգայի ընթացիկ խաղարկությունում արդեն վեց գոլ է խփել, և բոլորն էլ՝ երկրորդ խաղակեսում։ Ինչո՞վ է դա պայմանավորված։

— Առաջին հերթին մեզ հաջողվում է խաղի ընթացքից կախված ճիշտ փոփոխություններ կատարել մեր խաղում։ Բացի այդ, մենք ճիշտ ենք օգտագործում պահեստայինների նստարանից խաղադաշտ դուրս եկող ֆուտբոլիստներին․ մեր կազմում շատ որակյալ խաղացողներ կան։ Մենք նաև օգտվում ենք մրցակցի հոգնածությունից։ Այս բոլոր գործոնների համադրությունը մեզ հնարավորություն է տալիս երկրորդ խաղակեսում փոխել խաղի ընթացքը։

— Այսօր պաշտպանության գծում կարծես շախմատ էիք խաղում․ շատ վերադասավորումներ եղան, իսկ Ուգո Օլիվեյրան հանդես եկավ երեք դիրքում։ Ինչո՞վ էր դա պայմանավորված։ Ի՞նչ վիճակում է այժմ Մալիսը, և ինչո՞ւ նա չխաղաց։

— Մալիսը դեռ լիովին պատրաստ չէ խաղին։ Մեծ հավանականությամբ պատասխան հանդիպմանը կկարողանան մասնակցել Էդգար Գրիգորյանն ու Արմեն Համբարձումյանը, որոնք այսօր բացակայում էին։ Դա մեզ հնարավորություն կտա ֆուտբոլիստներին օգտագործել իրենց սովորական դիրքերում։

Ինձ շատ է դուր գալիս, թե ինչպես է Ուգո Օլիվեյրան գործում կիսապաշտպանության կենտրոնում։ Բացի այդ, հնարավորություն ստեղծվեց առաջին անգամ խաղադաշտ դուրս բերել Բրունո Պերեյրային, ուստի Օլիվեյրան տեղափոխվեց կիսապաշտպանություն։ Պերեյրան դեռ լավագույն մարզավիճակում չէ, սակայն այսօր լավ խաղաց։

Պետք է նաև արժանին մատուցել «Շեմրոք Ռովերսին»․ մրցակիցը լավ էր գրոհում։ Սակայն մենք հասկացանք, որ նրանց համար դժվար է, երբ երկար ժամանակ վերահսկում ենք գնդակը։ Այդ պատճառով պատասխան խաղում կփորձենք հնարավորինս շատ վերահսկել գնդակը։

— Ինչպե՞ս որոշեցիք Փոլ Այոնգոյին օգտագործել պաշտպանության եզրում։ Նախկինում դիտարկե՞լ էիք նման տարբերակ։

— Մենք գիտեինք, որ անհրաժեշտության դեպքում կարող ենք դիմել նման տարբերակի։ Նա կարող է խաղալ ինչպես աջ վինգերի, այնպես էլ եզրային պաշտպանի դիրքում։ Խաղն այնպես դասավորվեց, որ դրա անհրաժեշտությունն առաջացավ։

Մենք նաև գիտեինք, որ Բրունո Պերեյրան դեռ պատրաստ չէ ամբողջ հանդիպումն անցկացնելու, իսկ հետո վնասվածք ստացավ Կամո Հովհաննիսյանը։ Այս ամենը մեզ ստիպեց Այոնգոյին օգտագործել պաշտպանության եզրում։

Կամո Հովհաննիսյանը մեզ համար չափազանց կարևոր ֆուտբոլիստ է՝ առաջին հերթին իր առաջնորդական հատկանիշների և բնավորության շնորհիվ։ Իհարկե, Այոնգոն այդ դիրքում հայտնվեց ոչ թե լավ պայմաններից ելնելով։ Սակայն ես շնորհակալ եմ ֆուտբոլիստներին, որոնք նման իրավիճակներում ամբողջությամբ կատարում են մարզչական շտաբի պահանջները։ Դրա շնորհիվ ես կարող եմ ինձ թույլ տալ նման ռիսկային որոշումներ ընդունել։

— «Շեմրոք Ռովերսի» գլխավոր մարզիչը խաղից հետո ասաց, որ սպասում էր նման արդյունքի և, ընդհանուր առմամբ, չքննադատեց ո՛չ ֆուտբոլիստներին, ո՛չ թիմի խաղը։ Իսկ դուք սպասո՞ւմ էիք նման արդյունքի։

— Ես չեմ սիրում պարտվել։ Առաջին խաղակեսում մրցակիցը խաղում էր երկու հարձակվողով, իսկ հետո ստիպված եղավ անցնել մեկ հարձակվողով սխեմայի։ Մենք վերլուծել էինք նրանց խաղը և գիտեինք, թե ինչ վերադասավորումներ պետք է կատարեինք, որպեսզի ստիպեինք մրցակցին անցնել այլ սխեմայի։

Ավելի վաղ հարցրել էիք՝ արդյոք խաղալու ենք երեք կենտրոնական պաշտպանով։ Նման անհրաժեշտություն առաջացավ․ երկրորդ խաղակեսում անցանք երեք կենտրոնական պաշտպանով խաղի, և դա արդյունք տվեց։ Ընդհանուր առմամբ, մարտավարական տեսանկյունից ամեն ինչ ճիշտ արեցինք։

— Զիդան Բանժակին արդեն առաջին անգամ չէ, որ կարևոր գոլ է խփում թիմի կազմում։ Կարելի՞ է ասել, որ Զիդան անունը նրան պարտավորեցնում է փայլել հատկապես կարևոր հանդիպումներում։

— Ինձ թվում է՝ նա ինքն էլ դեռ ամբողջությամբ չի հասկանում, թե իրականում ինչի է ընդունակ։ Նա շատ լավ ֆուտբոլիստ է։ Երբ ցանկանա, կկարողանա վճռել ցանկացած հանդիպման ելքը։ Ինձ շատ են դուր գալիս նրա խաղային որակները։

Նա նաև կարող է հաջողությամբ գործել պրեսինգի ժամանակ և մրցակցի գրոհները կանգնեցնել դեռ սկզբնական փուլում։ Ընդհանուր առմամբ, չեմ կարող դժգոհել մեր հարձակման գծի խաղացողներից։ Բոլոր հարձակվողները շատ որակյալ են, և մենք ընտրության մեծ հնարավորություն ունենք։

— Ինչպե՞ս կարող է մարզիչը հարձակվողին ստիպել խաղալ պաշտպանության եզրում։

— Այոնգոն արդեն երկու շաբաթ մարզվում էր այդ դիրքում։ Ես նրան բացատրել էի, որ ինձ շատ է դուր գալիս Ուգո Օլիվեյրայի խաղը կիսապաշտպանությունում, ուստի Այոնգոն պաշտպանության եզրում պետք է լիներ պահեստային տարբերակ։ Նա ընդհանրապես չբողոքեց և աշխատեց մեծ ցանկությամբ։

— Ի՞նչն է ձեզ ավելի շատ դուր գալիս․ երբ նախնական ծրագիրը լավ է աշխատում և հաղթանակ է բերում, թե՞ երբ հանդիպման ընթացքում ձեր որոշումներով փոխում եք խաղն ու հասնում արդյունքի։

— Ֆուտբոլը շատ արագ է զարգանում, և մարզիչը յուրաքանչյուր վայրկյան պետք է ճիշտ որոշումներ ընդունի։ Կյանքն ինձ ցույց է տվել, որ հանդիպման ընթացքում պետք չէ վախենալ ռիսկային որոշումներից։

Ես թիմ չեմ եկել ֆուտբոլիստներին խաղալ սովորեցնելու համար։ Ես եկել եմ, որպեսզի հանդիպման ընթացքում օգնեմ նրանց ճիշտ որոշումներ ընդունել և հաղթանակի ճանապարհ գտնել։

Ֆուտբոլը հրաշալի է նրանով, որ սկզբում ամեն ինչ կարող է ընթանալ ծրագրի համաձայն, իսկ հետո հանկարծ քաոս սկսվի։ Այդ պատճառով պետք է խաղի համար մի քանի ծրագիր ունենալ, որպեսզի անհրաժեշտության դեպքում հնարավոր լինի արագ կյանքի կոչել դրանք։ Այս ամենը հանդիպման նախնական ծրագրի մի մասն է։

— Տպավորություն է ստեղծվում, որ վերջին շրջանում Ժիրայր Շաղոյանն ավելի շատ կենտրոնացած է խաղընկերների համար պահեր ստեղծելու, քան գրոհները եզրափակելու վրա։ Դա լա՞վ է, թե՞ վատ ձեզ համար։

— Առաջին հերթին նշեմ, որ Շաղոյանի և Սերոբյանի համար այսօրվա հանդիպումը շատ ծանր էր։ Մենք նրանցից պահանջում էինք անընդհատ օգնել պաշտպանությանը, իսկ գրոհի անցնելիս գնդակն առաջ էինք ուղարկում նրանց ուղղությամբ։ Նրանք ստիպված էին շատ վազել, սակայն արդեն սովորել են նման աշխատանքին։

Եթե Շաղոյանի կամ Սերոբյանի վերաբերյալ ձեզ մոտ նման տպավորություն է ստեղծվել, հնարավոր է՝ դա պայմանավորված է նրանով, որ հարձակման ժամանակ նրանք որոշում ընդունելու համար քիչ ժամանակ են ունենում։ Մեր մարտավարության պայմաններում նրանք հաճախ շատ հեռու են գտնվում դարպասից և ստիպված են վտանգավոր գրոհներ ստեղծել, այլ ոչ թե ավարտել դրանք։

Միևնույն ժամանակ ես ցանկանում եմ, որ գոլային պահեր ստեղծվելիս և՛ Շաղոյանը, և՛ Սերոբյանն ավելի վստահ լինեն ու ավելի հաճախ գոլեր խփեն։ Սակայն դա չի վերաբերում այսօրվա հանդիպմանը։ Այսօր նրանցից այլ բան էր պահանջվում, և նրանք փայլուն կատարեցին իրենց առաջադրանքը։

— Ի՞նչ վիճակում է այժմ Կամո Հովհաննիսյանը։ Արդեն որևէ տեղեկություն կա՞։

— Այսպես կասեմ․ եթե ընտրության հնարավորություն ունենայի՝ Կամոն վնասվածք չստանար, բայց հանդիպումն ավարտվեր ոչ-ոքի, թե մենք տանեինք այսօրվա հաղթանակը, ես կնախընտրեի ոչ-ոքին և առողջ Կամոյին։ Նա այնպիսի առաջնորդ է, որն իր էներգիայով և հաղթելու ձգտումով կարող է վարակել ամբողջ թիմին։

— Արմեն Համբարձումյանը լավ հանդիպում անցկացրեց «Ռիգայի» դեմ, սակայն այսօր հայտացուցակում չկար։ Ինչո՞ւ։

— Նա վնասվածք է ստացել մարզման ժամանակ։ Այսօր երկու ֆուտբոլիստ վնասվածքի պատճառով բաց էին թողնում հանդիպումը՝ Արմեն Համբարձումյանն ու Էդգար Գրիգորյանը։ Երբ նրանք առողջ են, միշտ խաղում են։ Կանենք հնարավոր ամեն բան, որպեսզի նրանք մասնակցեն պատասխան հանդիպմանը։

— Ինչո՞ւ Արայիկ Էլոյանը վերջին հանդիպումներում խաղաժամանակ չի ստանում։