Սպերցյանը մասնակցել է ամբողջ հանդիպմանը, սակայն չի կարողացել «Ալ Ահլիին» փրկել պարտությունից

Հայաստանի ազգային հավաքականի ավագ Էդուարդ Սպերցյանը մասնակցել է Սաուդյան Արաբիայի առաջնության 6-րդ տուրի հանդիպմանը, որում նրա «Ալ Ահլին» արտագնա խաղում մրցել է «Ալ Կադիսիայի» հետ։

Հանդիպումն անցել է արդյունավետ պայքարում և ավարտվել հայ կիսապաշտպանի թիմի՝ 2։3 հաշվով պարտությամբ։

Սպերցյանը «Ալ Ահլիի» մեկնարկային կազմում էր և խաղադաշտում անցկացրել է ամբողջ հանդիպումը։ Խաղից հետո SofaScore վիճակագրական հարթակը 26-ամյա ֆուտբոլիստի ելույթը գնահատել է 6,1 միավոր։

Խաղադաշտում անցկացրած ժամանակահատվածում Սպերցյանը կատարել է երկու հարված և աչքի է ընկել փոխանցումների բարձր ճշգրտությամբ։ Հայ կիսապաշտպանը կատարել է 51 ճշգրիտ փոխանցում՝ գրանցելով 95 տոկոս ճշգրտություն։ Բացի այդ, նա հաջողությամբ ավարտել է դրիբլինգի երեք փորձերից երկուսը։

Պաշտպանական գործողություններում Սպերցյանը գրանցել է մեկ խլում և գնդակի երկու վերադարձ։ Պայքարներում հայ ֆուտբոլիստը հաղթել է տասը մենամարտերից հինգում։

Չնայած Հայաստանի հավաքականի ավագի ակտիվությանը՝ «Ալ Ահլիին» չի հաջողվել դրական արդյունքի հասնել։ Վեց տուրից հետո թիմը Սաուդյան Արաբիայի առաջնության մրցաշարային աղյուսակում զբաղեցնում է 7-րդ տեղը։