Hype Fighting-ի շուրջ սկանդալ․ մարզիկները բողոքում են վճարումների ուշացումներից Բրազիլիայի մրցաշարերից հետո

ՄМА պրոմոուշեն Hype Fighting-ը հայտնվել է սկանդալի կենտրոնում՝ այն հաղորդագրություններից հետո, որ մարտին և ապրիլին Բրազիլիայում անցկացված երկու մրցաշարերի մասնակիցները մինչ այժմ չեն ստացել իրենց վարձատրությունները։

Ըստ MMA Fighting-ի տեղեկությունների՝ լրագրողների հետ կապ են հաստատել այդ իվենտներին մասնակցած 17 մարզիկներ, և բոլորը հաստատել են, որ վճարումները դեռ չեն իրականացվել։ Նրանց թվում են ինչպես նախնական մարտերի մասնակիցներ, այդ թվում՝ bare-knuckle կանոններով մենամարտողներ, այնպես էլ հիմնական քարտի մարտիկներ՝ ՄՄԱ-ի հայտնի ներկայացուցիչներ և նույնիսկ գործող UFC-ի որոշ աստղեր։

Հաղորդվում է, որ չվճարված գումարները տատանվում են մի քանի հարյուրից մինչև մի քանի հազար դոլար։ Որոշ մարզիկներ պնդում են, որ պրոմոուշենի ներկայացուցիչների հետ նամակագրության ընթացքում նրանց առաջարկվել է ջնջել հրապարակումները վճարումների ուշացումների մասին՝ ապագա մարտերի խոստումների դիմաց։

Նշվում է նաև, որ մարտիկների պայմանագրերում ամրագրված է՝ հոնորարը պետք է վճարվի մենամարտից հետո 30 աշխատանքային օրվա ընթացքում։ Սակայն ապրիլյան մրցաշարի դեպքում Սան Պաուլոյում այդ ժամկետն արդեն սպառվել է։

Hype Fighting-ի կազմակերպիչները մինչ այժմ հանրային մեկնաբանություն չեն տվել իրավիճակի վերաբերյալ։

Արման Ծառուկյան և Hype նախագծերը

Այս տեղեկությունների ֆոնին մեդիայում կրկին քննարկվում է հայ UFC մարտիկի՝ Arman Tsarukyan մասնակցությունը պրոմոուշենի մեդիա-գործունեություններին։

Ըստ մի շարք նյութերի և պրոմո-արշավների՝ Ծառուկյանը եղել է Hype Fighting-ի հիմնական դեմքերից մեկը և մասնակցել է մրցաշարերի առաջխաղացմանը՝ ներառյալ Երևանում և Ռիո դե Ժանեյրոյում անցկացված իվենտները, որտեղ նա ներկայացվել է որպես նախագծի դեսպան և գլխավոր աստղ։

Սկզբում հաղորդվում էր, որ նա պետք է գլխավորեր նաև Սան Պաուլոյի մրցաշարը, սակայն Դիլոն Դենիսի դեմ մենամարտի չեղարկումից հետո նրա մասնակցությունը Hype-ի առաջխաղացման գործունեությանը զգալիորեն նվազել է։ Մարտիկի սոցիալական ցանցերում և մեդիա տարածքում այլևս չեն հայտնվել կազմակերպության հետ կապված հրապարակումներ, ինչը ընթացիկ տեղեկությունների ֆոնին լրացուցիչ հարցեր է առաջացրել երկրպագուների և լրագրողների մոտ։

Միևնույն ժամանակ պաշտոնական հայտարարություններ՝ համագործակցության դադարեցման կամ պատճառների վերաբերյալ, ոչ մարզիկի, ոչ էլ պրոմոուշենի կողմից չեն հրապարակվել։

Hype Fighting-ի շուրջ իրավիճակը շարունակում է զարգանալ, իսկ կազմակերպության կողմից պաշտոնական մեկնաբանությունների բացակայությունը ուժեղացնում է ճնշումը մարզիկների և մեդիայի կողմից։ Եթե բոլոր ներկայացված փաստերը հաստատվեն, խոսքը կարող է լինել տարածաշրջանային ՄՄԱ-ի վերջին տարիների ամենամեծ սկանդալներից մեկի մասին։

Հայաստանի համար թեման առանձնապես զգայուն է, քանի որ Hype FC-ն արդեն անցկացրել է երկու մրցաշար Երևանում և նախատեսում է ևս անցկացնել։ Բացի այդ, կազմակերպության սեփականատերերն ու հիմնական դեմքերը էթնիկ հայեր են։ Այդ պատճառով հույս կա, որ իրավիճակը շուտ կկարգավորվի։