Հայաստանի Մ15 հավաքականը պարտվեց Մոլդովային և վերջին տեղը զբաղեցրեց ՈՒԵՖԱ-ի Զարգացման գավաթում
- Հեղինակ: Vahe Hakobyan
- Sportaran
Հայաստանի մինչև 15 տարեկանների ֆուտբոլի հավաքականն ավարտեց ելույթները ՈՒԵՖԱ-ի Զարգացման գավաթի խաղարկությունում, որն անցկացվում էր Բուլղարիայի Ալբենա քաղաքում։ Մրցաշարի վերջին խաղում Հայաստանի հավաքականը 2:5 հաշվով պարտվեց Մոլդովային։
Հանդիպումը կայացավ հոկտեմբերի 20-ին։ Արման Առաքելյանի գլխավորած Հայաստանի հավաքականի կազմում գոլերի հեղինակներ դարձան Մայքլ Հայկ Աղդայանը և Մարտին Սարգսյանը։ Սակայն նրանց խփած գոլերը բավարար չեղան պարտությունից խուսափելու համար։
Երեք հանդիպումների արդյունքում Հայաստանի Մ15 հավաքականը վաստակեց երեք միավոր և զբաղեցրեց մրցաշարային աղյուսակի չորրորդ՝ վերջին հորիզոնականը։ Հայ ֆուտբոլիստները խփեցին չորս գոլ և բաց թողեցին 13-ը։
Մոլդովայի և Կոսովոյի հավաքականները նույնպես մրցաշարն ավարտեցին երեքական միավորով, սակայն լրացուցիչ ցուցանիշներով առաջ անցան Հայաստանի հավաքականից։
ՈՒԵՖԱ-ի Զարգացման գավաթի հաղթող դարձավ Բուլղարիայի հավաքականը, որը հաղթեց բոլոր երեք հանդիպումներում և վաստակեց առավելագույնը՝ ինը միավոր։
Հիշեցնենք, որ մրցաշարի մեկնարկային խաղում Հայաստանի հավաքականը խոշոր՝ 0:8 հաշվով պարտվել էր Բուլղարիային։ Երկրորդ տուրում Արման Առաքելյանի սաներին հաջողվել էր վերականգնել դիրքերը՝ 2:0 հաշվով հաղթելով Կոսովոյին։
Այսպիսով, Հայաստանի հավաքականը մրցաշարն ավարտեց մեկ հաղթանակով և երկու պարտությամբ։