Մադրիդի «Ռեալը» կվերադարձնի Նիկո Պասին. սա կարող է մոտեցնել Սպերցյանի տեղափոխությունը «Կոմո»

Մադրիդի «Ռեալը» տեղեկացրել է «Կոմոյին», որ պատրաստվում է ակտիվացնել կիսապաշտպան Նիկո Պասի հետգնման տարբերակը։ Այս մասին հայտնում է հայտնի ինսայդեր Ֆաբրիցիո Ռոմանոն։

Նրա տեղեկություններով՝ իսպանական ակումբը պատրաստ է վերադարձնել արգենտինացի ֆուտբոլիստին 9 միլիոն եվրոյով։ Միևնույն ժամանակ, «Ռեալը» «Կոմոյին» հնարավորություն է տալիս պահել Պասին, սակայն արդեն զգալիորեն ավելի բարձր գումարով՝ 60 միլիոն եվրոյով։ Իտալական ակումբը պետք է որոշում կայացնի մինչև երկուշաբթի։

Եթե «Կոմոն» չհամաձայնի այս պայմաններին, հաջորդ շաբաթ Նիկո Պասը կվերադառնա «Ռեալ»։ Սակայն, Ռոմանոյի տվյալներով, մադրիդյան ակումբը կարող է կրկին հանել ֆուտբոլիստին տրանսֆերային շուկա, բայց արդեն 60 միլիոն եվրոյից բարձր գնով։

Այս իրավիճակը կարևոր է նաև Էդուարդ Սպերցյանի՝ «Կոմո» հնարավոր տեղափոխության տեսանկյունից։ Ավելի վաղ հաղորդվում էր, որ «Կրասնոդարի» ավագը իտալական ակումբում դիտարկվում է որպես Նիկո Պասին փոխարինելու տարբերակներից մեկը։

Այսպիսով, արգենտինացի կիսապաշտպանի ապագան կարող է ուղղակիորեն ազդել Սպերցյանի վերաբերյալ «Կոմոյի» ծրագրերի վրա։ Եթե Պասը հեռանա թիմից, Հայաստանի հավաքականի ֆուտբոլիստի նկատմամբ հետաքրքրությունը կարող է ավելի առարկայական դառնալ։