Մխիթարյանից մինչև Օսեյան. Ինչու է Դմիտրի Սելյուկը շարունակում մնալ հայկական ֆուտբոլի ամենահակասական դեմքերից մեկը

Դմիտրի Սելյուկի անունը կրկին հայտնվել է հայկական ֆուտբոլի ուշադրության կենտրոնում։ «Փյունիկի» գլխավոր մարզիչ Արտակ Օսեյանի հետ հրապարակային հակամարտությունից հետո ակումբը հայտարարեց մասնագետի հետ համագործակցության դադարեցման մասին։

Ինքը՝ Սելյուկը, նման իրավիճակների մեջ առաջին անգամ չէ հայտնվում։ Վերջին երկու տասնամյակների ընթացքում ֆուտբոլային գործակալն ու ֆունկցիոները բազմիցս դարձել է հայկական ֆուտբոլիստների հետ կապված աղմկահարույց պատմությունների մասնակից։

Նրա անունը կապվել է Հենրիխ Մխիթարյանի, Արաս Օզբիլիսի, Մարկոս Պիցցելլիի և այլ խաղացողների կարիերաների հետ, սակայն բազմաթիվ համագործակցություններ ուղեկցվել են հրապարակային վեճերով, փոխադարձ մեղադրանքներով և աղմկահարույց հայտարարություններով։

2026 թվականին Սելյուկը վերադարձավ հայկական ֆուտբոլ արդեն նոր կարգավիճակով՝ որպես «Փյունիկի» գլխավոր տնօրենի սպորտային հարցերով խորհրդական։ Գրեթե անմիջապես ակումբի շուրջ առաջացավ սկանդալ՝ կապված տրանսֆերային քաղաքականության և գլխավոր մարզչի լիազորությունների հետ։

Սակայն Սելյուկի հակասական հարաբերությունների պատմությունը հայկական ֆուտբոլի հետ սկսվել է շատ ավելի վաղ։

Հենրիխ Մխիթարյան. պատմություն, որը դարձավ մի ամբողջ դարաշրջանի խորհրդանիշ

Դմիտրի Սելյուկի կարիերայի ամենահայտնի պատմությունը շարունակում է մնալ Հենրիխ Մխիթարյանի հետ համագործակցությունը։

Սելյուկը բազմիցս հայտարարել է, որ հենց ինքը կարևոր դեր է ունեցել երիտասարդ հայ կիսապաշտպանի՝ նախ Դոնեցկի «Մետալուրգ», ապա «Շախտյոր» տեղափոխություններում։

Գործակալի խոսքով՝ ինքը համոզել է «Մետալուրգի» սեփականատեր Օլեգ Մկրտչյանին պայմանագիր կնքել Մխիթարյանի հետ, իսկ այնուհետև օգնել է կազմակերպել ֆուտբոլիստի տեղափոխությունը Ռինատ Ախմետովի ակումբ։

«Մխիթարյանին ես եմ բերել «Շախտյոր»։ Մկրտչյանն ինձ հարցնում էր՝ վերցնե՞լ Հենրիխին, թե՞ ոչ։ Հետո ես պայմանավորվեցի նրա և Ախմետովի միջև, որպեսզի Հենրիխը տեղափոխվի «Շախտյոր»»։

Հենց «Շախտյորում» անցկացրած շրջանը դարձավ Մխիթարյանի կարիերայի շրջադարձային փուլը։ Հայ ֆուտբոլիստը դարձավ թիմի առաջատարներից մեկը, նվաճեց Ուկրաինայի առաջնության չեմպիոնի տիտղոսը և գրավեց եվրոպական առաջատար ակումբների ուշադրությունը։

Սակայն ֆուտբոլիստի և Սելյուկի համագործակցությունը ավարտվեց։

Գործակալը պնդում էր, որ խաղացողի և նրա ընտանիքի վրա ճնշում է գործադրվել, ինչի պատճառով Մխիթարյանը դադարեցրել է համատեղ աշխատանքը։

«Նրանց և նրանց ընտանիքների վրա շատ մեծ ճնշում է գործադրվել»։

Սելյուկը նաև հայտարարել էր, որ Մխիթարյանը հնարավորություն ուներ ոչ թե տեղափոխվելու Դորտմունդի «Բորուսիա», այլ հանդես գալու Անգլիայի առաջնությունում։

«Եթե ես շարունակեի նրա հետ աշխատել, Մխիթարյանը պայմանագիր կկնքեր «Լիվերպուլի» հետ։ Ես արդեն ամեն ինչ պայմանավորվել էի»։

Հետագայում գործակալը բազմիցս վերադարձել է այդ թեմային և նշել, որ Անգլիա տեղափոխությունը ձախողվել է ֆուտբոլիստի շուրջ ստեղծված իրավիճակի փոփոխության պատճառով։

Ինքը՝ Մխիթարյանը, հրապարակային կերպով մանրամասն չի մեկնաբանել Սելյուկի հետ հակամարտությունը և չի հաստատել նրա տարբերակը։

Արաս Օզբիլիս. հակամարտություն «Սպարտակ» տեղափոխությունից հետո

Մեկ այլ աղմկահարույց պատմություն կապված էր Արաս Օզբիլիսի անվան հետ։

Սելյուկը պնդում էր, որ մասնակցել է կիսապաշտպանի՝ «Այաքսից» «Կուբան» տեղափոխությանը և ծրագրել է օգնել նրան կատարել հաջորդ քայլը եվրոպական կարիերայում։

Սակայն 2013 թվականի ամռանը Օզբիլիսը դարձավ Մոսկվայի «Սպարտակի» ֆուտբոլիստ։

Դրանից հետո Սելյուկը հայտարարեց, որ տրանսֆերի իրավիճակը չի զարգացել այնպես, ինչպես պետք էր, և խոսեց ավելի շահավետ առաջարկների մասին։

««Կուբանն» ուներ առաջարկ «Մոնակոյից»՝ 6 միլիոն եվրո, և «Մետալիստից»՝ 8 միլիոն։ Եվ հանկարծ՝ «Սպարտակ» ու երկու միլիոն»։

Սելյուկի խոսքով՝ ինքը պատրաստվում էր իրավական ճանապարհով պաշտպանել իր շահերը։

Մի քանի տարի անց նոր հակամարտություն առաջացավ Օզբիլիսի՝ թուրքական «Բեշիքթաշ» տեղափոխությունից հետո։

Սելյուկը կտրուկ քննադատեց ֆուտբոլիստի որոշումը և հայտարարեց․

«Նա համբուրելու է «Բեշիքթաշի» տարբերանշանը և խաղալու է Հայաստանի հավաքականի համար։ Սա մաքուր մարմնավաճառություն է»։

Այս արտահայտությունը մեծ արձագանք առաջացրեց հայ երկրպագուների շրջանում։

Օզբիլիսը շատ կոշտ պատասխանեց իր նախկին ներկայացուցչի խոսքերին։

«Սելյուկը հիմար է, եթե նման բան է ասել»։

Ֆուտբոլիստը հայտարարեց, որ Հայաստանի հավաքականն ընտրել է ոչ թե գումարի պատճառով։

«Եթե ես գումար ընտրեի, կընտրեի Հոլանդիայի հավաքականը»։

Օզբիլիսը ընդգծեց, որ Հայաստանի հավաքականում հանդես գալը եղել է իր անձնական որոշումն ու սրտի ընտրությունը։

Այսօր Հայաստանի նախկին հավաքականի ֆուտբոլիստը աշխատում է «Ուրարտուի» համակարգում՝ գլխավորելով ակումբի երկրորդ թիմը։ Ավելի վաղ նա հանդես էր եկել «Փյունիկում»։