Պաշտոնական. Մարկո Լազետիչը «Աբերդինից» տեղափոխվել է «Նոա»

Հայկական «Նոա» ֆուտբոլային ակումբը պաշտոնապես հայտարարել է սերբ հարձակվող Մարկո Լազետիչի հետ պայմանագիր կնքելու մասին։ 22-ամյա ֆուտբոլիստը տեղափոխվել է շոտլանդական «Աբերդինից» և երևանյան ակումբի հետ լիարժեք պայմանագիր է ստորագրել։

Լազետիչը Բելգրադի «Ցրվենա Զվեզդայի» սան է։ Սերբական ակումբի կազմում հարձակվողը երկու անգամ դարձել է երկրի չեմպիոն և նվաճել Սերբիայի գավաթը։

2022 թվականի հունվարին Լազետիչը տեղափոխվել է իտալական «Միլան»։ Նույն մրցաշրջանում միլանյան ակումբը դարձել է Իտալիայի չեմպիոն։ Հետագայում սերբ հարձակվողը վարձավճարով հանդես է եկել նիդերլանդական «Ֆորտունա Սիտարդում», սերբական «Բաչկա Տոպոլայում» և ավստրիական «Ալտախում»։

Ֆուտբոլիստի վերջին ակումբը եղել է «Աբերդինը»։ 2025/26 մրցաշրջանում Լազետիչը շոտլանդական թիմի կազմում բոլոր մրցաշարերում անցկացրել է 36 հանդիպում, խփել 4 գոլ և կատարել 2 գոլային փոխանցում։

«Նոան» «Աբերդինից» գնել է ֆուտբոլիստի տրանսֆերային իրավունքները։ Լազետիչի տրանսֆերային արժեքը գնահատվում է մեկ միլիոն եվրո։ Կենտրոնական հարձակվողի հասակը 192 սմ է։

Հայկական ակումբում Մարկո Լազետիչը հանդես կգա 8 համարի մարզաշապիկով։