Հայաստանի Պրեմիեր լիգայի ֆուտբոլիստների արժեքները թարմացվել են․ թոփ-10-ում «Նոայի» ինը խաղացող կա
- Հեղինակ: Vahe Hakobyan
- Sportaran
Transfermarkt-ը թարմացրել է Հայաստանի Պրեմիեր լիգայի ֆուտբոլիստների շուկայական արժեքները 2025/26 մրցաշրջանի ավարտից հետո։
Թարմացումից հետո Հայաստանի առաջնության միանգամից երեք ֆուտբոլիստ ունեն առավելագույն՝ 900 հազար եվրո արժեք։ Խոսքը Վալենտին Կոստակեի, Նարդին Մուլահուսեյնովիչի և Էլդեր Ֆերեյրայի մասին է։
Միևնույն ժամանակ, լիգայի ամենաթանկ ֆուտբոլիստների թոփ-10-ում գերիշխում է «Նոան»․ ակումբի միանգամից ինը խաղացող ընդգրկված է վարկանիշի առաջին տասնյակում։ Սա արտացոլում է ոչ միայն թիմի հաջող մրցաշրջանը, այլև Transfermarkt-ի կողմից կազմի բարձր գնահատականը։
Առաջնության ամենաթանկ հայ ֆուտբոլիստները շարունակում են մնալ Սերգեյ Մուրադյանը, Ժիրայր Շաղոյանը և Արթուր Սերոբյանը։ Նրանցից յուրաքանչյուրի արժեքը չի փոխվել և կազմում է 500 հազար եվրո։
Թարմացումից հետո ամենամեծ առաջընթացը գրանցել է «Ալաշկերտի» բրազիլացի կիսապաշտպան Ռաֆայել Ժեզուսը։ Նրա շուկայական արժեքն աճել է 150 հազար եվրոյով և այժմ կազմում է 250 հազար եվրո։
Եվս մի քանի ֆուտբոլիստների արժեքն աճել է 100 հազար եվրոյով։ Նրանց թվում են Էլդեր Ֆերեյրան, Նարդին Մուլահուսեյնովիչը, Բրունո Միշելը, Մոմո Յանսանեն, ինչպես նաև «Գանձասարի» ֆուտբոլիստ Մայքլ Կվարկուն, որը նախկինում Transfermarkt-ում գնահատական չուներ։
Հայ ֆուտբոլիստների շրջանում ամենանշանակալի առաջընթացը ցույց է տվել Արամ Խամոյանը։ Նրա արժեքն աճել է 75 հազար եվրոյով և այժմ կազմում է 200 հազար եվրո։
Կան նաև նկատելի անկումներ։ Թիմոթի Ֆայուլուն և Տակուտո Օշիման շուկայական արժեքում կորցրել են 200-ական հազար եվրո։