«Նոան» ներկայացրել է 2026/27 մրցաշրջանի նոր մարզաշապիկը

Հայկական «Նոա» ֆուտբոլային ակումբը ներկայացրել է 2026/27 մրցաշրջանի նոր խաղային համազգեստը։ Այն պատրաստված է ակումբի համար դասական սև ու սպիտակ գույներով և ներկայացված է երկու երանգով։ Համազգեստի դիզայնում օգտագործվել են Հայաստանի բնության և խորհրդանիշների հետ կապված տարրեր։

Մարզաշապիկի վրա պատկերված են Բազեի՝ «Նոայի» նոր խորհրդանիշի թևերը, որոնք մարմնավորում են անընդհատ դեպի վեր ձգտումը և անհրաժեշտ պահին նպատակին հասնելու կարողությունը։

Դիզայնի մյուս առանձնահատկությունը «Քարերի սիմֆոնիա» բնական հուշարձանի բազալտե սյուներն են, որոնք ձևավորվել են հրաբխային լավայի սառեցման հետևանքով և խորհրդանշում են բնության ներդաշնակությունը։

Համազգեստի վրա պատկերված է նաև Հայաստանի դրոշը։ Ակումբում նշել են, որ նոր մարզաշապիկի դիզայնը ոգեշնչված է Հայկական լեռնաշխարհի բնական տեսարժան վայրերից և ստեղծվել է հայկական ոգին ամբողջ աշխարհում տարածելու նպատակով։

«Նոան» 2026/27 մրցաշրջանում հանդես կգա Հայաստանի առաջնությունում և կմասնակցի ՈւԵՖԱ-ի Կոնֆերենցիաների լիգայի որակավորման փուլին։ Նոր մարզաշապիկով առաջին հանդիպումը թիմը կանցկացնի արդեն հուլիսի 23-ին՝ Կոնֆերենցիաների լիգայի որակավորման երկրորդ փուլի մոլդովական «Զիմբրուի» դեմ խաղում։