Նիդերլանդները ջախջախեց Շվեդիային, Գերմանիան հաղթանակ կորզեց Կոտ դ’Իվուարից ԱԱ-2026-ում

Ֆուտբոլի աշխարհի առաջնություն-2026-ի խմբային փուլում կայացան երկու կարևոր հանդիպումներ։ Նիդերլանդների հավաքականը խոշոր հաշվով հաղթեց Շվեդիային, իսկ Գերմանիան Դենիզ Ունդավի դուբլի շնորհիվ հաղթանակ կորզեց Կոտ դ’Իվուարից և ապահովեց իր տեղը փլեյ-օֆֆում։

Նիդերլանդները 5 գոլ խփեց Շվեդիային և գլխավորեց խումբը

Նիդերլանդների հավաքականը վստահ հաղթանակ տարավ Շվեդիայի նկատմամբ F խմբի խաղում։ Հյուսթոնում կայացած հանդիպումն ավարտվեց 5։1 հաշվով։

Խաղի գլխավոր հերոսները Բրայան Բրոբբին և Կոդի Գակպոն էին, որոնք դուբլ ձևակերպեցին։ Արդեն 5-րդ րոպեին Բրոբբին բացեց հաշիվը Գակպոյի փոխանցումից հետո, իսկ 17-րդ րոպեին հարձակվողը եզրափակեց Դենզել Դումֆրիսի փոխանցումը և հաշիվը դարձրեց 2։0։

Շվեդիան փորձում էր վերադառնալ խաղ, և Գուստաֆ Լագերբիլկեի հարվածից հետո նույնիսկ գոլ խփեց, սակայն այն չեղարկվեց խաղից դուրս վիճակի պատճառով։ Ընդմիջումից հետո Նիդերլանդները արագ լուծեց հաղթողի հարցը․ Գակպոն աչքի ընկավ 47-րդ և 54-րդ րոպեներին՝ նախ գոլ խփելով մոտ տարածությունից, ապա հարվածելով տուգանային հրապարակի մատույցներից։

Շվեդիան 59-րդ րոպեին պատասխանեց Էնթոնի Էլանգայի գոլով, սակայն վերջնամասում Կրիսենսիո Սամերվիլը ձևակերպեց վերջնական հաշիվը՝ 5։1։

Այս հաղթանակից հետո Նիդերլանդները բարձրացավ F խմբի առաջին հորիզոնական և մեկ միավորով շրջանցեց Շվեդիային։ Գրեհեմ Փոթերի թիմը նահանջեց երկրորդ տեղ՝ Ճապոնիա — Թունիս հանդիպումից առաջ։

Ունդավը Գերմանիային բերեց կամային հաղթանակ և փլեյ-օֆֆի ուղեգիր

Գերմանիայի հավաքականը 2։1 հաշվով հաղթեց Կոտ դ’Իվուարին և դուրս եկավ ԱԱ-2026-ի 1/32 եզրափակիչ։ Գերմանացիներին հաղթանակ պարգևեց Դենիզ Ունդավը, որը փոխարինման դուրս եկավ երկրորդ խաղակեսում և դուբլ ձևակերպեց։

Կոտ դ’Իվուարը հաշիվը բացեց 30-րդ րոպեին։ Յան Դիոմանդեի անցումից և տուգանային հրապարակ կատարած փոխանցումից հետո գնդակը հասավ Ամադու Դիալոյին։ Նրա հարվածը փակվեց, սակայն անդրադարձած գնդակին առաջինը հասավ Ֆրանկ Կեսյեն՝ 1։0։

Մինչ այդ Գերմանիան նույնպես պահեր ուներ։ Կայ Հավերցը փոխանցումից հետո հարվածեց դարպասից բարձր, իսկ ավելի ուշ չկարողացավ հաղթել Յահյա Ֆոֆանային Յոզուա Կիմիխի փոխանցումից հետո։ Գերմանացիները նույնիսկ գոլ խփեցին անկյունայինից հետո, սակայն Ալեքսանդր Պավլովիչի գոլը չեղարկվեց կանոնների խախտման պատճառով։

Երկրորդ խաղակեսում Յուլիան Նագելսմանը ուժեղացրեց խաղը փոխարինումներով։ 60-րդ րոպեին խաղադաշտ դուրս եկան Նադիմ Ամիրին և Դենիզ Ունդավը, և արդեն ութ րոպե անց այս փոփոխությունը արդյունք տվեց։ Ամիրին ճշգրիտ փոխանցում կատարեց, իսկ Ունդավը գլխով հավասարեցրեց հաշիվը։

Կոտ դ’Իվուարը կարող էր կրկին առաջ անցնել հաշվի մեջ, երբ Սիմոն Ադինգրան Նիկոլա Պեպեի և Էվան Գեսանի մասնակցությամբ գրոհից հետո գնդակը ստացավ տուգանային հրապարակում, սակայն պահը չօգտագործվեց։

Հանգուցալուծումը եղավ 90+4-րդ րոպեին։ Լուկաս Նմեչան փոխանցում կատարեց տուգանային հրապարակ, Ունդավը շրջվեց և դիպուկ հարվածով Գերմանիային բերեց հաղթանակ՝ 2։1։

Եզդիական արմատներով ֆուտբոլիստի համար սա արդեն երրորդ գոլն էր աշխարհի առաջնություն-2026-ում։ Բացի այդ, Ունդավը մրցաշարում արդեն ունի նաև 2 գոլային փոխանցում։

Գերմանիան երաշխավորեց իր տեղը փլեյ-օֆֆում՝ նվազագույնը լավագույն երրորդ տեղերից մեկով։ Այժմ թիմը կսպասի Կյուրասաո — Էկվադոր հանդիպման արդյունքին՝ հասկանալու համար, թե արդյոք կկարողանա խմբային փուլն ավարտել առաջին հորիզոնականում։