Հայաստանի անհաջող մեկնարկը ըմբշամարտի ԱԱ-2026-ում․ Ամոյանը պարտվեց, բոլոր չորս ըմբիշները դուրս մնացին ոսկու համար պայքարից

Հոկտեմբերի 24-ին Ղազախստանի մայրաքաղաք Աստանայում մեկնարկել է հունահռոմեական ոճի ըմբշամարտի 2026 թվականի աշխարհի առաջնությունը։ Մրցումային առաջին օրը գորգ են դուրս եկել Հայաստանի հավաքականի չորս ներկայացուցիչներ, սակայն նրանցից ոչ մեկին չի հաջողվել հասնել քառորդ եզրափակիչ։

Գլխավոր անակնկալը դարձել է աշխարհի գործող չեմպիոն Մալխաս Ամոյանի (77 կգ) պարտությունը, որը տիտղոսի պաշտպանության համար պայքարն ավարտել է արդեն 1/8 եզրափակիչում։ Հաջորդ փուլ դուրս գալ չեն կարողացել նաև Սուրեն Աղաջանյանը (60 կգ), Նորայր Ախոյանը (55 կգ) և Սամվել Գրիգորյանը (82 կգ)։

Այսպիսով, հայ ըմբիշները վեց գոտեմարտում տարել են ընդամենը երկու հաղթանակ։ Միևնույն ժամանակ, բոլոր չորս մարզիկները դեռևս պահպանում են սփոփիչ գոտեմարտերի միջոցով բրոնզե մեդալների համար պայքարելու տեսական հնարավորությունը։

Մալխաս Ամոյանը սենսացիոն պարտություն կրեց Ղազախստանի ներկայացուցչից

Հայաստանի հավաքականի ոսկե մեդալի գլխավոր հավակնորդ Մալխաս Ամոյանն աշխարհի առաջնությունը սկսել է Ռուսաստանի ներկայացուցիչ Սերգեյ Կուտուզովի նկատմամբ դժվարին հաղթանակով։ Գոտեմարտն ավարտվել է 1:1 հաշվով, իսկ հայ ըմբիշը հաջորդ փուլ է անցել լրացուցիչ չափանիշների առավելության շնորհիվ։

Սակայն արդեն 1/8 եզրափակիչում Ամոյանն անսպասելիորեն 2:4 հաշվով պարտվել է Ղազախստանի ներկայացուցիչ Մերեյ Մաուլիտկանովին։

Վճռորոշ դրվագը տեղի է ունեցել առաջին մրցափուլում, երբ ղազախ ըմբիշը կարողացել է օգտվել պարտերում հնարք կատարելու Ամոյանի անհաջող փորձից։ Տեսակրկնությունը դիտելուց հետո Մաուլիտկանովին լրացուցիչ միավորներ են շնորհվել, և հայ մարզիկը հայտնվել է հաշվի մեջ հետապնդողի դերում։

Երկրորդ մրցափուլում Ամոյանին չի հաջողվել բեկել գոտեմարտի ընթացքը։

Չի բացառվում, որ Մալխասի ֆիզիկական վիճակի վրա ազդել են Լեհաստանում վերջերս կայացած մրցաշարի ընթացքում ստացած վնասվածքի հետևանքները։ Սակայն առայժմ հաստատված չէ, որ հենց վնասվածքն է ազդել արդյունքի վրա։

Այժմ աշխարհի առաջնությունների երրորդ ոսկե մեդալը նվաճելու փորձը Ամոյանը ստիպված կլինի հետաձգել առնվազն մինչև հաջորդ տարի։ Աստանայում նա դեռ կարող է պայքարել բրոնզե մեդալի համար, եթե Մաուլիտկանովը հասնի եզրափակիչ։

Սուրեն Աղաջանյանը հաղթեց առաջին գոտեմարտում, սակայն պարտվեց ճապոնացուն

Երիտասարդ հայ ըմբիշ Սուրեն Աղաջանյանը (60 կգ), որն իր նորամուտն է նշում մեծահասակների աշխարհի առաջնությունում, մրցաշարը սկսել է Վրաստանի ներկայացուցիչ Դիմիտրի Խաչիձեի նկատմամբ տպավորիչ հաղթանակով՝ 9:6։

1/8 եզրափակիչում Աղաջանյանը հանդիպել է ճապոնացի Կոտո Գոմիի հետ։ Գոտեմարտը հայ ըմբիշի համար չափազանց անհաջող ընթացք է ունեցել։

0:8 հաշվի ժամանակ Հայաստանի մարզչական շտաբը պահանջել է վիճահարույց դրվագի տեսակրկնություն։ Բողոքարկումը հաջող է եղել, և հաշիվը վերանայվել է՝ դառնալով 4:6։

Սակայն Աղաջանյանին չի հաջողվել զարգացնել հաջողությունը։ Ճապոնացի ըմբիշը կրկին տիրել է նախաձեռնությանը և ի վերջո ժամանակից շուտ հաղթանակ տարել 12:4 հաշվով։

Այսպիսով, Եվրոպայի 2026 թվականի առաջնության արծաթե մեդալակիրը հիմնական մրցաշարն ավարտել է մեկ հաղթանակով և մեկ պարտությամբ։ Նրա հետագա ճակատագիրը կախված է Կոտո Գոմիի արդյունքից։

Նորայր Հախոյանն ու Սամվել Գրիգորյանը պարտվեցին մեկնարկային գոտեմարտերում

55 կգ քաշային կարգում Նորայր Հախոյանն իր առաջին իսկ գոտեմարտում հանդիպել է աշխարհի գործող չեմպիոն, Վրաստանի ներկայացուցիչ Վախթանգ Լոլուայի հետ։

Հայ ըմբիշը լուրջ դիմադրություն է ցույց տվել տիտղոսակիր մրցակցին, սակայն պարտվել է նվազագույն տարբերությամբ՝ 1:2։ Արդյունքում Հախոյանը կանգ է առել 1/8 եզրափակիչում։

Անհաջող է դասավորվել աշխարհի առաջնությունը նաև Սամվել Գրիգորյանի (82 կգ) համար։ Մեկնարկային գոտեմարտում հայ ըմբիշը 1:2 հաշվով պարտվել է Ռուսաստանի ներկայացուցիչ Գամզատ Հաջիևին և չի կարողացել անցնել հաջորդ փուլ։

Հայ ըմբիշների արդյունքները հոկտեմբերի 24-ին՝ ԱԱ-2026-ում

• 55 կգ — Նորայր Ախոյան․ պարտություն Վախթանգ Լոլուայից (Վրաստան)՝ 1:2։

• 60 կգ — Սուրեն Աղաջանյան․ հաղթանակ Դիմիտրի Խաչիձեի (Վրաստան) նկատմամբ՝ 9:6, պարտություն Կոտո Գոմիից (Ճապոնիա)՝ 4:12։

• 77 կգ — Մալխաս Ամոյան․ հաղթանակ Սերգեյ Կուտուզովի (Ռուսաստան) նկատմամբ՝ 1:1՝ լրացուցիչ չափանիշներով, պարտություն Մերեյ Մաուլիտկանովից (Ղազախստան)՝ 2:4։

• 82 կգ — Սամվել Գրիգորյան․ պարտություն Գամզատ Հաջիևից (Ռուսաստան)՝ 1:2։

Չնայած անհաջող մեկնարկին՝ բոլոր չորս հայ ըմբիշները դեռևս պահպանում են բրոնզե մեդալ նվաճելու տեսական հնարավորությունը։

Դրա համար նրանց հաղթած մրցակիցները պետք է հասնեն իրենց քաշային կարգերի եզրափակիչ։

55, 60, 77 և 82 կգ քաշային կարգերում սփոփիչ գոտեմարտերն ու մեդալների համար պայքարը տեղի կունենան հոկտեմբերի 25-ին։

Նույն օրը աշխարհի առաջնությունում պայքարը կսկսեն Հայաստանի ևս երեք ներկայացուցիչներ՝ Աշոտ Խաչատրյանը (72 կգ), Հայկ Խլոյանը (97 կգ) և Ռազմիկ Քուրդյանը (130 կգ)։

Ընդհանուր առմամբ, Աստանայում անցկացվող հունահռոմեական ոճի ըմբշամարտի աշխարհի առաջնությունում Հայաստանի հավաքականը ներկայացված է տասը մարզիկով։