Նարեկ Դավթյանը դարձել է ձյուդոյի Մ17 աշխարհի առաջնության արծաթե մեդալակիր

Օգոստոսի 21-ին Էկվադորի Գուայաքիլ քաղաքում մեկնարկել է ձյուդոյի մինչև 17 տարեկանների 2026 թվականի աշխարհի առաջնությունը։ Մրցումների առաջին օրը տատամի են դուրս եկել Հայաստանի հավաքականի երեք ներկայացուցիչներ։ Լավագույն արդյունքը գրանցել է Նարեկ Դավթյանը՝ մինչև 55 կգ քաշային կարգում նվաճելով արծաթե մեդալ։

Դավթյանը մրցաշարը սկսել է Մեքսիկայի ներկայացուցչի նկատմամբ հաղթանակով։ Այնուհետև հայ ձյուդոիստը հաջորդաբար հաղթել է Ֆրանսիայի և Ադրբեջանի ներկայացուցիչներին, իսկ կիսաեզրափակչում առավելության է հասել ուկրաինացի մարզիկի նկատմամբ։

Եզրափակչում Նարեկը հանդիպել է ամերիկացի Սեբաստիան Տերանի հետ։ Վճռորոշ գոտեմարտը լարված պայքարում է անցել և ավարտվել ԱՄՆ ներկայացուցչի նվազագույն առավելությամբ․ գոտեմարտի միակ՝ վազա-արի գնահատականը վաստակել է Տերանը։

Աշխարհի առաջնության արծաթը Նարեկ Դավթյանի համար դարձել է միջազգային մրցաշարերում նվաճած առաջին մեդալը։

Հայաստանի ևս երկու ներկայացուցիչներ ավարտել են ելույթները մրցաշարի վաղ փուլերում։

Մինչև 50 կգ քաշային կարգում Կարեն Նավասարդյանն առաջին գոտեմարտում հաղթել է ֆրանսիացի ձյուդոիստին, որից հետո պարտվել է Բրազիլիայի ներկայացուցչին։

Մինչև 60 կգ քաշային կարգում հանդես եկող Նարեկ Նահապետյանը նույնպես առաջնությունը սկսել է Ֆրանսիայի ներկայացուցչի նկատմամբ հաղթանակով, սակայն երկրորդ գոտեմարտում պարտվել է ուկրաինացի մարզիկին։

Մրցումային հաջորդ օրերին Հայաստանը կներկայացնեն ևս երեք ձյուդոիստներ՝ Սերգեյ Գևորգյանը (66 կգ), Արտեմ Գալստյանը (66 կգ) և Դավիթ Ջուլհակյանը (81 կգ)։

Ձյուդոյի Մ17 աշխարհի առաջնության առաջին օրվա արդյունքները

Տղաներ

Մինչև 50 կգ

1. Ֆարիդ Ռզազադե (Ադրբեջան)
2. Ադիլժան Նուրբեկեն (Ղազախստան)
3. Բեկարիս Կուդայբերգեն (Ղազախստան) և Անդրեա Հոֆման (Ֆրանսիա)

Մինչև 55 կգ

1. Սեբաստիան Տերան (ԱՄՆ)
2. Նարեկ Դավթյան (Հայաստան)
3. Նոհամ Բենկրուադեմ (Ֆրանսիա) և Բոբուր Յուսուպով (Ուզբեկստան)

Մինչև 60 կգ

1. Գաբբիտ Ռուսուլխան (Ղազախստան)
2. Ռոման Սեմիրոզում (Կանադա)
3. Ահմետ Բաուբեկ (Ղազախստան) և Էնխտուր Ջամիյան (Մոնղոլիա)

Աղջիկներ

Մինչև 40 կգ

1. Իրոդա Սիրոջիդդինովա (Ուզբեկստան)
2. Ադիա Ժանախմետ (Ղազախստան)
3. Անա Միկելե Ալկանտարա (Բրազիլիա) և Էմիլիա Սայֆուտդինովա (Ռուսաստան)

Մինչև 44 կգ

1. Ռեգինա Ախտիամովա (Ռուսաստան)
2. Սեմա Նուր Յուքսել (Թուրքիա)
3. Ալինա Կոլուչևա (Ուզբեկստան) և Յուլիա Բաշչուկ (Լեհաստան)

Մինչև 48 կգ

1. Էդդա Բար Լև (Իսրայել)
2. Մաելս Դապա (Բելգիա)
3. Չարոս Նիխմատովա (Ուզբեկստան) և Ագամ Սոլ Նոյ (Իսրայել)