Մխիթարյանը կմնա «Ինտերում». նոր պայմանագիրն արդեն համաձայնեցված է

Հենրիխ Մխիթարյանը կշարունակի հանդես գալ Միլանի «Ինտերում»։ Հայ կիսապաշտպանը ակումբի հետ կստորագրի նոր՝ մեկ տարվա պայմանագիր, հայտնում է Ֆաբրիցիո Ռոմանոն։

Ինսայդերների տեղեկություններով՝ կողմերի միջև համաձայնությունը ձեռք է բերվել դեռ մոտ երկու շաբաթ առաջ։ Նոր պայմանագիրը նախատեսված կլինի մեկ մրցաշրջանի համար և կներառի ֆուտբոլիստի աշխատավարձի նվազեցում։

Բանակցությունների վերաբերյալ հետաքրքիր մանրամասն է հայտնել «Ինտերի» սպորտային տնօրեն Պիերո Աուզիլիոն։ Նրա խոսքով՝ Մխիթարյանն անձամբ է զբաղվում իր պայմանագրի հետ կապված բոլոր հարցերով՝ առանց գործակալի մասնակցության։

«Մխիթարյանն անձամբ է բանակցում՝ առանց գործակալի։ Նա այլ մակարդակի վրա է», — ասել է Աուզիլիոն Supernova-ին տված հարցազրույցում։

Այսպիսով, 37-ամյա հայ ֆուտբոլիստի ապագայի շուրջ իրավիճակը փաստացի հստակեցվել է։ Դեռ վերջերս չէր բացառվում, որ ավարտված մրցաշրջանը կարող էր վերջինը լինել Մխիթարյանի պրոֆեսիոնալ կարիերայում, սակայն այժմ նա կմնա Իտալիայի ուժեղագույն ակումբներից մեկում առնվազն ևս մեկ տարի։

Ավելի վաղ հաղորդվում էր, որ Մխիթարյանը համաձայնել է նոր պայմանագրի ձևաչափին ակումբի ղեկավարության և մարզչական շտաբի հետ բանակցություններից հետո։ «Ինտերում» բարձր են գնահատում նրա փորձը, պրոֆեսիոնալիզմը, ազդեցությունը հանդերձարանում և թիմին օգտակար լինելու կարողությունը նույնիսկ կարիերայի ուշ փուլում։

Հենրիխ Մխիթարյանը «Ինտերում» հանդես է գալիս 2022 թվականից։ Այդ ընթացքում նա դարձել է թիմի կարևոր մասնիկը և օգնել «ներաձուրիներին» նվաճել մի քանի տիտղոս, այդ թվում՝ Սերիա Ա-ի չեմպիոնությունը։

Հայկական ֆուտբոլի համար Մխիթարյանի՝ «Ինտերի» հետ պայմանագիրը երկարաձգելը կարևոր իրադարձություն է. Հայաստանի պատմության լավագույն ֆուտբոլիստներից մեկը կշարունակի կարիերան եվրոպական ամենաբարձր մակարդակում։