Մեքսիկան վստահ հաղթեց Էկվադորին և դուրս եկավ ԱԱ-2026-ի 1/8 եզրափակիչ

Մեքսիկայի հավաքականը շարունակում է տպավորիչ ելույթները տնային աշխարհի առաջնությունում։ Խավիեր Ագիրեի գլխավորած թիմը ԱԱ-2026-ի 1/16 եզրափակչում վստահ հաղթեց Էկվադորին 2:0 հաշվով և դուրս եկավ մրցաշարի 1/8 եզրափակիչ։

Մեխիկոյի Mexico City Stadium մարզադաշտում հանդիպումը մեկնարկեց մեկ ժամ ուշացումով՝ անբարենպաստ եղանակային պայմանների պատճառով։ Սակայն այդ դադարը ոչ մի կերպ չազդեց տանտերերի տրամադրվածության վրա. մեքսիկացիները առաջին իսկ րոպեներից նախաձեռնությունը վերցրին իրենց ձեռքը և մի քանի վտանգավոր պահ ստեղծեցին Էռնան Գալինդեսի դարպասի մոտ։

Արդեն խաղի առաջին քառորդում աչքի ընկնելու լավ հնարավորություններ ունեին Խիլբերտո Մորան, Լուիս Ռոմոն և Ռաուլ Խիմենեսը։ Էկվադորը պատասխանեց 18-րդ րոպեին Ջոն Յեբոայի հարվածով, որից հետո գնդակը դիպավ դարպասաձողի արտաքին հատվածին։ Բայց շատ չանցած Մեքսիկան, այնուամենայնիվ, բացեց հաշիվը։

22-րդ րոպեին Ռոբերտո Ալվարադոն փոխանցում կատարեց Էկվադորի պաշտպանների թիկունքը, իսկ Խուլիան Կինյոնեսը, որը փոխանցման պահին գտնվում էր սեփական կիսադաշտում և խուսափել էր խաղից դուրս վիճակից, դուրս եկավ դարպասի դիմաց ու հզոր հարվածով գնդակն ուղարկեց ցանցը՝ 1:0։

Գոլից հետո Մեքսիկան շարունակեց ճնշումը։ 31-րդ րոպեին Կինյոնեսն արդեն հանդես եկավ փոխանցողի դերում. նա հիանալի հնարավորություն ստեղծեց Ռաուլ Խիմենեսի համար, իսկ վերջինս կրկնապատկեց տանտերերի առավելությունը՝ 2:0։

Երկրորդ խաղակեսում Խավիեր Ագիրեի թիմը գործեց առավելագույնս վստահ և գրեթե հնարավորություն չտվեց Էկվադորին վերադառնալ խաղ։ Մեքսիկայի պաշտպանական գիծը՝ Սեսար Մոնտեսի և Յոհան Վասկեսի գլխավորությամբ, անցկացրեց հուսալի հանդիպում, իսկ դարպասապահ Ռաուլ Ռանգելը կրկին անառիկ պահեց դարպասը։ Նրա համար սա արդեն չորրորդ անընդմեջ «չոր» հանդիպումն էր մրցաշարում։

Մեքսիկան կարող էր նաև մեծացնել առավելությունը ստանդարտ դիրքերից. Մոնտեսն ու Վասկեսը մոտ էին գոլի՝ անկյունայիններից հետո գլխով կատարած հարվածներով։

Էկվադորի համար երեկոն ավարտվեց ևս մեկ տհաճ դրվագով։ Արդեն ավելացված ժամանակում Պիերո Ինկապիեն կարմիր քարտ ստացավ Մեքսիկայի հավաքականի հարձակվող Սանտիագո Խիմենեսի հետ տեղի ունեցած միջադեպից հետո։

Հետաքրքիր է, որ մինչև այս հանդիպումը Մեքսիկան աշխարհի առաջնություններում հարավամերիկյան հավաքականների դեմ անցկացրած 14 խաղում միայն մեկ հաղթանակ ուներ։ Այդ հաղթանակը նույնպես գրանցվել էր Էկվադորի նկատմամբ՝ 2002 թվականին, երբ մեքսիկացիներին կրկին գլխավորում էր Խավիեր Ագիրեն։

Այժմ Մեքսիկան կխաղա ԱԱ-2026-ի 1/8 եզրափակչում։ Հանդիպումը կկայանա հուլիսի 5-ին Mexico City Stadium-ում, իսկ տանտերերի մրցակիցը կլինի Անգլիա — Կոնգոյի ԴՀ զույգի հաղթողը։