Կարեն Խաչանովը փրկեց հինգ մատչբոլ և դրամատիկ հաղթանակ տարավ Ալմաթիի ATP մրցաշարում

Հայկական ծագումով ռուսաստանցի թենիսիստ Կարեն Խաչանովը դրամատիկ հաղթանակ տարավ Ղազախստանի Ալմաթի քաղաքում ընթացող ATP 250 մրցաշարի երկրորդ շրջանում և դուրս եկավ քառորդ եզրափակիչ։

Հոկտեմբերի 22-ին 30-ամյա Խաչանովը, որն ATP-ի համաշխարհային դասակարգման աղյուսակում զբաղեցնում է 25-րդ տեղը, մրցեց չեխ թենիսիստ Տոմաշ Մախաչի հետ, որը վարկանիշային աղյուսակում 72-րդն է։

Լարված հանդիպումը տևեց 2 ժամ 32 րոպե և ավարտվեց Խաչանովի հաղթանակով երեք սեթում՝ 6:2, 4:6, 7:6 (9:7) հաշվով։

Խաչանովը վստահորեն հաղթեց առաջին սեթում, սակայն երկրորդում Մախաչին հաջողվեց վերականգնել հավասարակշռությունը։ Իսկական պայքար ծավալվեց վճռորոշ սեթում, երբ չեխ թենիսիստը մի քանի հնարավորություն ստացավ հանդիպումն ավարտելու իր օգտին։

Խաչանովը կարողացավ փրկել հինգ մատչբոլ, պահպանել հաղթանակի հնարավորությունը և հանդիպման ելքը տեղափոխել թայ-բրեյք։ Վճռորոշ պահին Կարենն ավելի ուժեղ գտնվեց՝ թայ-բրեյքում հաղթելով 9:7 հաշվով։

Հանդիպման ընթացքում Խաչանովը կատարեց 14 էյս և իրացրեց վեց բրեյք-փոյնթից երկուսը։

Մրցաշարի քառորդ եզրափակչում Խաչանովը կհանդիպի ղազախստանցի Ալեքսանդր Բուբլիկի և հունգարացի Ֆաբիան Մարոժանի հանդիպման հաղթողի հետ։

Հիշեցնենք, որ առաջին շրջանում Կարենը վստահ հաղթանակ էր տարել ճապոնացի Ռեյ Սակամոտոյի նկատմամբ՝ 6:2, 6:4 հաշվով։