Էլինա Ավանեսյանը և Ալինա Չարաևան նշել են Լոս Անջելես-2028 Օլիմպիական խաղերը որպես գլխավոր նպատակ

Հայաստանի թենիսի հավաքականի ներկայացուցիչներ Էլինա Ավանեսյանը (WTA 159) և Ալինա Չարաևան (WTA 108) հայտարարել են, որ առաջիկա տարիների իրենց գլխավոր նպատակը օլիմպիական ուղեգրեր նվաճելն ու 2028 թվականին Լոս Անջելեսում կայանալիք Օլիմպիական խաղերին Հայաստանը ներկայացնելն է։

Մարզուհիները հանդիպել են ԶԼՄ ներկայացուցիչների հետ Երևանում՝ Keron զարգացման հիմնադրամի և Հայաստանի թենիսի ֆեդերացիայի նախաձեռնությամբ կազմակերպված մամուլի ասուլիսի շրջանակում։ Հանդիպման ընթացքում նրանք խոսել են Հայաստանի դրոշի ներքո ելույթների, պրոֆեսիոնալ կարիերայի և ապագայի ծրագրերի մասին։

Էլինա Ավանեսյանը, որը 2024 թվականի օգոստոսից միջազգային մրցաշարերում ներկայացնում է Հայաստանը, նշել է, որ Օլիմպիական խաղերին մասնակցությունը իր կարիերայի գլխավոր նպատակներից մեկն է։

«Պարզապես պետք է շարունակել քրտնաջան աշխատել, մի փոքր ավելի մեծ ջանքեր գործադրել և բարձրանալ վարկանիշային աղյուսակում, որպեսզի ի վերջո հայտնվենք Օլիմպիական խաղերում։ Հայաստանի հավաքականի հետ Billie Jean King Cup-ում հաղթանակը և հաջորդ փուլ դուրս գալը մի բան է, որը ես երբեք չեմ մոռանա», — ասել է Ավանեսյանը։

2026 թվականի հունիսին թենիսիստուհին Հայաստանի կանանց հավաքականի կազմում իր նորամուտն է նշել Billie Jean King Cup-ում՝ Սան Մարինոյում։ Մրցաշարի արդյունքներով Հայաստանի թիմը իրավունք է ստացել հանդես գալ մրցաշարի երկրորդ խմբում։

Ավանեսյանը խոստովանել է, որ մեծ հաճույքով է հանդես գալիս ազգային հավաքականի կազմում և շարունակում է սովորել հայերեն։

«Ես շատ ոգևորված եմ։ Իմ կողքին հիանալի թիմ կա, մեր բոլոր աղջիկները շատ լավն են», — նշել է թենիսիստուհին։

Էլինայի խոսքով՝ նա արդեն սովորել է հայկական այբուբենի 22 տառ։ Մարզուհին պատմել է, որ մանկության տարիներին ծնողների հետ շփվել է արցախյան բարբառով, սակայն հայերենին ամբողջությամբ չի տիրապետել։

Օլիմպիական հավակնությունների մասին խոսել է նաև Ալինա Չարաևան, որը 2026 թվականից հանդես է գալու Հայաստանի համար։

«Ինձ համար սա ամենամեծ նպատակն է՝ մասնակցել Լոս Անջելեսի Օլիմպիական խաղերին։ Հայաստանի համար դա յուրահատուկ իրադարձություն կլինի։ Հույս ունեմ՝ այս հրաշալի երկրի համար մեդալ նվաճել։ Այժմ պետք է փորձենք բարձրանալ վարկանիշում, որպեսզի կարողանանք մասնակցել 2028 թվականի Օլիմպիական խաղերին», — հայտարարել է Չարաևան։

24-ամյա թենիսիստուհին ստացել է Հայաստանի քաղաքացիություն և արդեն սկսել է միջազգային մրցաշարերում հանդես գալ հայկական դրոշի ներքո։ Ավելի վաղ նա բարձր դիրքեր է զբաղեցրել ITF-ի պատանեկան վարկանիշում՝ հասնելով մինչև 12-րդ տեղ։

Չարաևան պատմել է, որ առաջին անգամ է այցելել Հայաստան և տպավորված է եղել ընդունելությունից։

«Այստեղ մարդկանց առանձնացնում է անհավանական ջերմությունը, որը հնարավոր չէ նկարագրել բառերով։ Ինձ համար մեծ պատիվ է ներկայացնել Հայաստանը», — ասել է թենիսիստուհին։

Հանդիպման ընթացքում մարզուհիները քննարկել են նաև Հայաստանում թենիսի զարգացման հարցերը։ ԿԳՄՍ նախարար Ժաննա Անդրեասյանը նշել է Ավանեսյանի և Չարաևայի ելույթների կարևորությունը՝ միջազգային ասպարեզում երկրի ճանաչելիությունը բարձրացնելու գործում։

Նա ընդգծել է, որ Հայաստանի տղամարդկանց և կանանց հավաքականների հաջողությունները ցույց են տալիս այս մարզաձևի զարգացման մեծ ներուժը։ Կանանց թիմը նախկինում բարձրացել էր Billie Jean King Cup-ի երկրորդ խումբ, իսկ տղամարդկանց հավաքականը բարձրացում էր ապահովել Դևիսի գավաթում հաջող ելույթից հետո։

Հայաստանի թենիսի ֆեդերացիայի նախագահ Վարդան Զաքարյանը ներկայացրել է Երևանում թենիսի ենթակառուցվածքների զարգացման ծրագրերը։ Կողմերը քննարկել են նաև երեխաների շրջանում թենիսի տարածումը և հայտնի մարզիկների մասնակցությամբ միջոցառումների կազմակերպումը։

Հայաստան կատարած այցից հետո Ավանեսյանն ու Չարաևան կմեկնեն Բրազիլիա, ապա կմասնակցեն Ասիայի մրցաշարերին, այդ թվում՝ Չինաստանում և Կորեայում անցկացվող մրցումներին։ Հետագայում մարզուհիները կսկսեն նոր մրցաշրջանի նախապատրաստությունը և կմասնակցեն Australian Open-ին։

Առաջիկա երկու տարիների գլխավոր խնդիրն է վարկանիշային դիրքերի բարելավումը, որը թույլ կտա հայ թենիսիստուհիներին պայքարել Լոս Անջելես-2028 Օլիմպիական խաղերի ուղեգրերի համար։