Էդուարդ Սպերցյան. «Հպարտ եմ, որ միացել եմ «Ալ-Ահլիին» և ցանկանում եմ օգնել ակումբին տիտղոսներ նվաճել»

Հայ կիսապաշտպան Էդուարդ Սպերցյանը մեկնաբանել է իր տեղափոխությունը սաուդյան «Ալ-Ահլի»։

Պայմանագիրը ստորագրելուց հետո ֆուտբոլիստը նշել է, որ հպարտ է նոր ակումբի մաս դառնալու հնարավորությամբ և պատրաստ է անել ամեն ինչ թիմի հաջողության համար։

«Ես շատ հպարտ եմ, որ միացել եմ «Ալ-Ահլի» ակումբին, և անհամբերությամբ սպասում եմ, որ ամբողջ ուժով նվիրվեմ աշխատանքին ու իմ ներդրումը ունենամ տիտղոսներ նվաճելու և երկրպագուներին ուրախություն պարգևելու գործում», — ասել է Սպերցյանը։

«Ալ-Ահլիի» մարզական տնօրեն Ռուի Պեդրուն նույնպես ողջունել է թիմի նորեկին և ընդգծել հայ կիսապաշտպանի բարձր մակարդակը։

«Մենք ուրախ ենք ողջունել Էդուարդ Սպերցյանին «Ալ-Ահլիում»։ Նա բացառիկ մակարդակի ֆուտբոլիստ է՝ հաջողությունների և ձեռքբերումների տպավորիչ պատմությամբ։ Մենք վստահ ենք, որ նա կարևոր համալրում կլինի մեր թիմի համար և առանցքային դեր կխաղա առաջիկա մրցաշրջաններում ակումբի նպատակներին հասնելու գործում», — հայտարարել է Ռուի Պեդրուն։

Սպերցյանն արդեն միացել է նոր թիմին Ավստրիայում անցկացվող ուսումնամարզական հավաքի ժամանակ։ Հայ ֆուտբոլիստը գլխավոր մարզիչ Մաթիաս Յայսլեի գլխավորությամբ անցկացրել է առաջին մարզումը։

«Ալ-Ահլի» տեղափոխությունը նոր փուլ է Սպերցյանի կարիերայում․ առաջիկա մրցաշրջանում նա հանդես կգա Սաուդյան Արաբիայի առաջնությունում։