Արտակ Օսեյան. «Թիմից ավելին էինք սպասում, բայց կարևոր է, որ կրկին հաղթեցինք»

«Փյունիկի» գլխավոր մարզիչ Արտակ Օսեյանն ամփոփել է Կոնֆերենցիաների լիգայի որակավորման առաջին փուլի՝ մալթայական «Մարսաշլոկի» դեմ պատասխան հանդիպման արդյունքները։

Երևանում կայացած հանդիպումն ավարտվել է հայկական թիմի՝ 1:0 հաշվով հաղթանակով։ Միակ գոլը 80-րդ րոպեին 11-մետրանոցից խփել է Դանիիլ Կուլիկովը։ Ընդ որում՝ հյուրերը տասներորդ րոպեից խաղացել են տասը ֆուտբոլիստով՝ դարպասապահ Քրիստոֆեր Մաֆումբիի հեռացումից հետո։

Երկու հանդիպումների ընդհանուր արդյունքով «Փյունիկը» հաղթել է 4:0 հաշվով և դուրս եկել Կոնֆերենցիաների լիգայի որակավորման երկրորդ փուլ, որտեղ կմրցի հունգարական «Դեբրեցենի» հետ։

Արտակ Օսեյանի մամուլի ասուլիսը

Գլխավոր մարզչի ներածական խոսքը.

— Այսօր մեր թիմից ավելին էինք սպասում։ Հարձակման գծում ստեղծագործականությունն ու արագությունը բարձր մակարդակի վրա չէին։ Սակայն կարևոր է, որ պատասխան հանդիպումը նույնպես ավարտեցինք հաղթանակով։

— Խաղի ցածր տեմպը պայմանավորված էր ֆուտբոլիստների ոչ բավարար պատրաստվածությա՞մբ, թե՞ առաջին հանդիպման արդյունքն էր ազդել նրանց գործողությունների վրա։

— Այո՛, առաջին հանդիպման արդյունքն ազդեց խաղի վրա։ Բացի այդ, մրցակիցը հանդիպման սկզբում կարմիր քարտ ստացավ, ինչը նույնպես անդրադարձավ խաղի հետագա ընթացքի վրա։

— Դուք Հովհաննես Հարությունյանի հետ աշխատել եք և՛ «Արարատ-Արմենիայում», և՛ «Փյունիկում»։ Ձեզ չի՞ թվում, որ «Փյունիկի» կազմում նա բոլորովին այլ ֆուտբոլիստ է։

— Նա միշտ էլ լավ ֆուտբոլիստ է եղել։ Շատ բան կախված է նրանից, թե ինչպես են նրան օգտագործում։ Ամեն դեպքում, ուրախ ենք, որ Հովհաննեսը մեր թիմում է, և սպասում ենք, որ նա կվերադառնա իր լավագույն մարզավիճակին։

— Ի՞նչ կարող եք ասել ձախլիկ Նիկոլաոս Կայնուրգիոսի մասին, որը խաղում է ձախ կենտրոնական պաշտպանի դիրքում։ Թիմում ևս մեկ ձախլիկ պաշտպան կար, որը տեղափոխվեց «Նոա»։ Ցանկանո՞ւմ էիք նրան պահել թիմում։

— Անկեղծ ասած՝ չէինք նախատեսում նրան պահել կազմում, սակայն առաջարկել էինք վարձավճարով տեղափոխվել այլ թիմ։ Նա չհամաձայնեց, այդ պատճառով հեռացավ մշտական հիմունքներով։ Ինչ վերաբերում է Կայնուրգիոսին, ապա նա օգտակար է թիմին, ուստի խաղաժամանակ է ստանում։ Պաշտպանությունում մեծ մրցակցություն կա, և միշտ խաղալու է ուժեղագույնը։

— Ինչպե՞ս եք գնահատում առաջիկա հանդիպումների ժամանակացույցը։ Այժմ պետք է մեկնեք Հունգարիա՝ «Դեբրեցենի» դեմ խաղին, այնուհետև վերադառնաք։

— Դա նորմալ է։ Եթե թռիչքը շատ բարդ չէ, ապա սարսափելի ոչինչ չկա։ Սակայն ներկայիս պայմաններում մեզ գրեթե միշտ դժվար է հասնել արտագնա հանդիպումների անցկացման վայր, այնպես որ որոշակի բարդություններ կան։

— Այսօր Հովհաննես Հարությունյանը խաղում էր հարձակվողական եռյակում, թեև սովորաբար նրան տեսնում ենք կիսապաշտպանության կենտրոնում։ Նրա համար կոնկրետ դիրք կա՞, թե՞ ամեն ինչ կախված կլինի իրավիճակից։

— Հովհաննեսը բազմակողմանի ֆուտբոլիստ է, սակայն ինձ համար նա «ութ համար» կամ «վեց համար» է։ Այժմ ստիպված էինք փոխել խաղային սխեման։ Հուսով եմ՝ շուտով կկարողանանք վերադառնալ մեր սովորական դասավորությանը, որտեղ յուրաքանչյուր ֆուտբոլիստ կխաղա իր դիրքում։

— Դուք երկար ժամանակ աշխատում եք հայկական ֆուտբոլում։ «Փյունիկը» երկու հանդիպումներում էլ զգալիորեն գերազանցեց մրցակցին, թեև նման առավելություն միշտ չէ, որ տեսնում ենք նույնիսկ Հայաստանի առաջնությունում։ Կարելի՞ է հիմա ասել, որ հայկական ակումբները գերազանցում են մալթայական թիմերին և պետք է հաղթեն նրանց վարպետության հաշվին։

— Համաձայն եմ, որ հայկական ակումբային ֆուտբոլը զգալիորեն զարգացել է։ Սակայն սխալ կլինի ամբողջ մալթայական ֆուտբոլը գնահատել միայն այս դիմակայության հիման վրա։ Պետք է յուրաքանչյուր թիմ առանձին դիտարկել։ Մեր մրցակիցը նույնպես թույլ չէր․ պարզապես մենք արտագնա առաջին հանդիպումը շատ լավ անցկացրինք։

— Եթե Հայաստանի առաջնությունն անցնի «գարուն–աշուն» համակարգին, և ակումբները եվրագավաթներում հանդես գան մրցաշրջանի կեսին, դա դրական կանդրադառնա՞ արդյունքների վրա։

— Կարծում եմ՝ այո՛։ Այդ դեպքում մենք ավելի լավ հանդես կգանք եվրագավաթներում։ Բացի այդ, չունենք համապատասխան ենթակառուցվածքներ՝ ձմռանը լիարժեք հանդիպումներ անցկացնելու համար։ Հետևաբար «գարուն–աշուն» համակարգին անցնելը օգտակար կլինի հայկական ֆուտբոլի համար։