Հայաստանի Մ19 հավաքականը կարող է մասնակցել Տաշքենդի միջազգային մրցաշարին
- Հեղինակ: Vahe Hakobyan
- Sportaran
Հայաստանի մինչև 19 տարեկանների հավաքականը կմասնակցի Միրաբրոր Ուսմանովի հիշատակին նվիրված միջազգային մրցաշարին, որը կանցկացվի հոկտեմբերի 1-ից 6-ը Տաշքենդում։ Այս մասին հայտնի է դարձել Ռուսաստանի ֆուտբոլային միության հրապարակումից։
ՌՖՄ-ի տեղեկությունների համաձայն՝ մրցաշարին կմասնակցեն Հայաստանի, Ուզբեկստանի, Ռուսաստանի և Սաուդյան Արաբիայի պատանեկան հավաքականները։ Մասնավորապես, Հայաստանի և Ռուսաստանի հավաքականների հանդիպումը նախատեսված է հոկտեմբերի 5-ին։
Միևնույն ժամանակ Հայաստանի ֆուտբոլի ֆեդերացիան այս պահին պաշտոնապես չի հայտնել Տաշքենդում կայանալիք մրցաշարին Հայաստանի հավաքականի մասնակցության մասին։ Ավելին՝ ՀՖՖ-ի պաշտոնական կայքի օրացույցում նույն օրերին նշված են Հայաստանի Մ19 հավաքականի երկու ընկերական հանդիպումներ Էստոնիայի դեմ՝ հոկտեմբերի 2-ին և 5-ին Երևանում։
Հայաստանի հետ երկու հանդիպումներն էլ ներառված են նաև Էստոնիայի ֆուտբոլի ֆեդերացիայի պաշտոնական կայքի խաղացանկում։
Այսպիսով, առայժմ պարզ չէ, թե ինչպես կձևավորվի Հայաստանի հավաքականի խաղացանկը։ Չի բացառվում, որ մարզչական շտաբը ֆուտբոլիստներին բաժանի երկու կազմի․ նրանցից մեկը Երևանում ընկերական հանդիպումներ անցկացնի Էստոնիայի դեմ, իսկ մյուսը մեկնի Տաշքենդ՝ մասնակցելու միջազգային մրցաշարին։
Հայաստանի ֆուտբոլի ֆեդերացիայի կողմից նման որոշման վերաբերյալ պաշտոնական հաստատում առայժմ չկա։
Հիշեցնենք, որ սեպտեմբերին Հայաստանի պատանեկան հավաքականները ևս միջազգային ընկերական հանդիպումներ են անցկացնում։ Սեպտեմբերի 16-ին և 19-ին Հայաստանի Մ16 հավաքականը կխաղա Լիբանանի հասակակիցների դեմ։