Արման Ծառուկյանը RAF 14-ի մամուլի ասուլիսում փորձել է հարվածել Դիլոն Դենիսին՝ Խամզաթ Չիմաևին վիրավորելու պատճառով
- Հեղինակ: Vahe Hakobyan
- Sportaran
Լաս Վեգասում կայանալիք RAF 14 ըմբշամարտի մրցաշարին ընդառաջ կազմակերպված մամուլի ասուլիսը վերածվել է զանգվածային ծեծկռտուքի՝ UFC-ի հայազգի մարտիկ Արման Ծառուկյանի և ամերիկացի Դիլոն Դենիսի մասնակցությամբ։ Հակամարտության պատճառը Խամզաթ Չիմաևին վիրավորող գրությամբ սադրիչ շապիկն էր։
Միջադեպը տեղի է ունեցել հոկտեմբերի 22-ին՝ մարզիկների և լրագրողների հանդիպման ժամանակ։ Բանավոր վիճաբանության ընթացքում Դենիսը ցուցադրել է շապիկ, որի վրա պատկերված էր Չիմաևն առանց մորուքի, իսկ լուսանկարի տակ գրված էր «Խամզաթն իմ քածն է»։
Տեսնելով իր ընկերոջն ու մարզումային գործընկերոջն ուղղված վիրավորական գրությունը՝ Ծառուկյանը կտրուկ վեր է կացել տեղից, նետվել Դենիսի վրա և փորձել հարվածել նրան։
Կազմակերպիչների ներկայացուցիչներն ու անվտանգության աշխատակիցներն անմիջապես միջամտել են՝ փորձելով կանգնեցնել հայ մարտիկին։ Սակայն իրավիճակը շատ արագ դուրս է եկել վերահսկողությունից. բեմ են բարձրացել նաև մարզիկների թիմերի ներկայացուցիչները, ինչից հետո զանգվածային ծեծկռտուք է սկսվել։
Հակամարտությանը միջամտել է նաև Խամզաթ Չիմաևը, որը ներկաների թվում էր։ Անվտանգության աշխատակիցներին հաջողվել է բաժանել բախման մասնակիցներին և վերականգնել կարգուկանոնը։
Միջադեպից հետո Ծառուկյանն ու Դենիսը չեն վերադարձել բեմ՝ ավանդական դեմ առ դեմ կանգնելու արարողությանը մասնակցելու համար։
Նշենք, որ Դենիսի և Չիմաևի միջև արդեն հակամարտություն էր տեղի ունեցել 2026 թվականի հունիսին՝ RAF 10 մրցաշարում, երբ նրանց ըմբշամարտի գոտեմարտը նույնպես ավարտվել էր զանգվածային ծեծկռտուքով։
Արման Ծառուկյանն ու Դիլոն Դենիսը պետք է հանդիպեն հոկտեմբերի 23-ին՝ Լաս Վեգասում կայանալիք RAF 14 մրցաշարի գլխավոր գոտեմարտում։ Երեկոյի երկրորդ գլխավոր մենամարտում Խամզաթ Չիմաևը կմրցի UFC-ի նախկին չեմպիոն Ռոբի Լոուլերի հետ։