Խիստ իսրայելցի մրցավարը կսպասարկի «Նոա» — «ԱԶ Ալկմար» հանդիպումը

Իսրայելից մրցավարական բրիգադ է նշանակվել Կոնֆերենցիաների լիգայի 1/16 եզրափակչի «Նոա» (Հայաստան) — «ԱԶ Ալկմար» (Նիդերլանդներ) հանդիպմանը։ Խաղը կկայանա փետրվարի 19-ին Երևանում և կմեկնարկի տեղական ժամանակով 21:45-ին։

Գլխավոր մրցավար է նշանակվել Օրել Գրինֆելդը։

Նրան կօգնեն՝

Կողային մրցավարներ՝ Ռոյ Հասան և Իդան Յարկոնի,
VAR մրցավար՝ Դանիել Բար Նատան,
VAR-ի օգնական մրցավար՝ Էյթան Շմուլևից,
Պահեստային մրցավար՝ Գալ Լեյբովից։

Ամբողջ մրցավարական բրիգադը ներկայացնում է Իսրայելը։

ՈւԵՖԱ-ի պատվիրակ է նշանակվել Էդի Կինդլը (Լիխտենշտեյն),
Մրցավարների աշխատանքի դիտորդ՝ Լևան Պենիաշվիլի (Վրաստան)։

Ընթացիկ մրցաշրջանում Գրինֆելդը սպասարկել է Եվրոպա լիգայի երեք հանդիպում, սակայն հիմնականում աշխատել է Իսրայելի առաջնությունում։ Ընդհանուր առմամբ նա սպասարկել է 18 խաղ, որոնց ընթացքում նշանակել է 9 տուգանային հարված (11 մետրանոց) և ցույց տվել 4 կարմիր քարտ։ Հատկանշական է, որ այդ որոշումները կայացվել են ներքին առաջնության խաղերում։

Հատկապես առանձնանում է «Իրոնի Տիբերիաս» — «Մաքքաբի Թել Ավիվ» (1:4) հանդիպումը, որտեղ մրցավարը նշանակել է միանգամից երեք 11 մետրանոց։

Վիճակագրությունը ցույց է տալիս, որ Երևանում սպասվող հանդիպումը կսպասարկի բավական սկզբունքային և ակտիվ որոշումներ կայացնող մրցավար։