Հայաստանի Մ-19 կանանց հավաքականը մեկնարկեց որակավորման փուլը՝ պարտությամբ Սերբիայից

Հայաստանի մինչև 19 տարեկանների կանանց հավաքականը մեկնարկեց իր մասնակցությունը Եվրոպայի առաջնության ընտրական փուլում։ B1 խմբի մեկնարկային խաղում Մարիամ Ստեփանյանի գլխավորած թիմը պարտվեց մինի-մրցաշարի հյուրընկալողներին՝ Սերբիայի հավաքականին։ Սերբիայի Ֆուտբոլային միության մարզական կենտրոնում կայացած հանդիպումն ավարտվեց սերբական թիմի 3:0 հաշվով հաղթանակով։

Առաջին խաղակեսը գոլազուրկ անցնելուց հետո սերբ ֆուտբոլիստուհիները կարողացան նախաձեռնությունը վերցնել երկրորդ կեսում։ 53-րդ րոպեին հաշիվը բացեց Մայա Սենանովիչը։ Ավարտին մոտ Լանա Տոդորովիչը կրկնապատկեց առավելությունը, իսկ ավելացված ժամանակում Պաուլինա Ստանիչը ձևակերպեց վերջնական հաշիվը՝ 3:0։

Խմբի մյուս հանդիպմանը Չեռնոգորիան 3:1 հաշվով հաղթեց Կիպրոսին։

Հայաստանի М-19 հավաքականի հաջորդ խաղը կկայանա նոյեմբերի 29-ին, մրցակիցը կլինի Չեռնոգորիայի հավաքականը։ B1 խմբի բոլոր հանդիպումները անցկացվում են Սերբիայի մարզադաշտերում։

ԵՎՐՈ-19 (կանանց), ընտրական փուլ — 1-ին տուր
Սերբիա – Հայաստան՝ 3:0
Գոլեր՝ Սենանովիչ (53), Տոդորովիչ (80), Ստանիչ (90+4)