Վրեժ Չիլոյանը տեղափոխվել է ֆուտզալ և արդեն նվաճել է առաջին տիտղոսը «Երևանի» կազմում

«Փյունիկի» սան Վրեժ Չիլոյանը այժմ հանդես է գալիս ֆուտզալում և արդեն աչքի է ընկել հաջողությամբ. ՖԱ «Երևան»-ի կազմում նա դարձավ Հայաստանի Գավաթակիր: Եզրափակչում՝ «Լոգիկոնի» դեմ խաղում, 23-ամյա վինգերը դարձավ դուբլի հեղինակ՝ օգնելով իր նոր թիմին նվաճել հեղինակավոր տիտղոսը։

Բացի այդ, Չիլոյանը մեծ դերակատարում է ունեցել «Երևանի»՝ Հայաստանի Բարձրագույն լիգայի փլեյ-օֆֆի եզրափակիչ դուրս գալու գործում․ նա գրեթե յուրաքանչյուր հանդիպմանը կարողացել է գոլ խփել։ Եզրափակիչ հանդիպումները «Յունիսպորտի» դեմ կկայանան մայիսի 21-ին և 25-ին։

Հիշեցնենք, որ 2025 թվականի հունվարին Չիլոյանը հեռացավ «Գանձասարից» և իր կարիերայում անսպասելի քայլ կատարեց՝ միանալով ֆուտզալի թիմի։

Մինչ այդ նա բավական հաջող կարիերա ուներ մեծ ֆուտբոլում։ «Փյունիկ II»-ի կազմում 2022/23 մրցաշրջանում նա Հայաստանի Առաջին լիգայում խփել է 19 գոլ, իսկ այնուհետև հանդես է եկել Պրեմիեր լիգայի «Վան»-ի կազմում՝ 18 խաղում դառնալով 4 գոլի հեղինակ։ Նա նաև հանդես է եկել Հայաստանի տարբեր տարիքի հավաքականներում։

Եթե Չիլոյանը շարունակի նույն ոգով, հնարավոր է, որ նա հայտնվի Հայաստանի ֆուտզալի հավաքականի հայտացուցակում ԵՎՐՈ-2026-ի համար․ այդ դեպքում նրա արագ անցումը նոր սպորտաձև կլինի իսկական ճակատագրական որոշում։

Նշենք, որ «Երևանի» կազմում հանդես են գալիս նաև Պրեմիեր լիգայի մի շարք նախկին խաղացողներ՝ Ռաֆիկ Մելիքյանը, Միգրան Դերմենջյանը, սակայն մեծ ֆուտբոլում ամենախոշոր հաջողության է հասել թիմի ավագ Կարեգին Մաշումյանը, որը «Բաբանցի» (ներկայում՝ «Ուրարտու») կազմում գոլեր էր խփում Չեմպիոնների լիգայի որակավորման փուլում։