Վիկտոր Գոնչարենկո․ ես հիանալի հարաբերություններ ունեմ թե՛ Սպերցյանի, թե՛ Տիկնիզյանի հետ

Բելառուսի ազգային հավաքականի գլխավոր մարզիչ Վիկտոր Գոնչարենկոն Հայաստանի հետ խաղից առաջ կայացած մամուլի ասուլիսում հիշել է Հայաստանի հավաքականի ֆուտբոլիստներ Էդուարդ Սպերցյանի և Նաիր Տիկնիզյանի հետ համատեղ աշխատանքը։

«Իմ հնարավորությունների սահմաններում, որպես մարզիչ, ես խորհուրդ եմ տվել Սպերցյանին տեղափոխվել ավելի ուժեղ առաջնություն։ Իհարկե, նա խաղում է շատ լավ թիմում, որտեղ նրան սիրում և հարգում են։ Բայց ես կցանկանայի, որ նա կրկներ Մխիթարյանի ճանապարհը, ով ունի շատ հարուստ միջազգային կարիերա։
Սպերցյանի ունեցած որակներով նա լիովին կարող է գնալ այդ ճանապարհով։

Ինչ վերաբերում է Նաիր Տիկնիզյանին, ապա նա ինձ հետ անցել է բավական երկար ճանապարհ։ Երբ երիտասարդ ֆուտբոլիստները հայտնվում են ՑՍԿԱ-ի նման թիմում, նրանց ժամանակ է պետք իրենց դրսևորելու համար։ Սովորաբար նրանք երկու տարի անցկացնում են հիմնական և պահեստային կազմերի միջև, և եթե առաջընթաց են գրանցում, տեղափոխվում են հիմնական կազմ — այդպես էլ եղավ Նաիրի դեպքում։
«Լոկոմոտիվից» «Ցրվենա Զվեզդա» տեղափոխվելը բավական բարձր մակարդակ է։

Պատասխանելով Բելառուսի և Հայաստանի հավաքականների աշխարհի և Եվրոպայի առաջնություններին մասնակցելու հնարավորությունների մասին հարցին՝ Գոնչարենկոն նշեց․
«Առանց հավատքի հնարավոր չէ սկսել աշխատանքը։ Մենք պետք է թակենք, և վաղ թե ուշ դռները կբացվեն»։

Հիշեցնենք, որ ավելի վաղ Գոնչարենկոն մարզել է Մոսկվայի ՑՍԿԱ-ն և «Կրասնոդարը»։

Հայաստան — Բելառուս հանդիպումը կկայանա մարտի 29-ին, Երևանի ժամանակով 18:00-ին (Մոսկվայի ժամանակով՝ 17:00-ին)։