«Վեստ Արմենիա»-ի հայտարարությունը Պրեմիեր լիգայից դուրս մնալուց հետո

Ֆուտբոլային ակումբ «Վեստ Արմենիան» հանդես է եկել պաշտոնական հայտարարությամբ՝ Fastex Պրեմիեր լիգայի 2024/25 մրցաշրջանից դուրս մնալուց հետո։ Որոշումը կայացրել է Հայաստանի ֆուտբոլի ֆեդերացիայի կարգապահական և էթիկայի կոմիտեն՝ կապված թիմի՝ 30-րդ տուրի «Արարատ-Արմենիայի» հետ խաղին չներկայանալու հետ։ Թիմին գրանցվել է տեխնիկական պարտություն՝ 0:3 հաշվով, իսկ երկրորդ անգամ չներկայանալը հանգեցրել է մրցաշարից հեռացմանը։

Հայտարարության մեջ ակումբը զղջում է հայտնել ստեղծված իրավիճակի համար և նշել է, որ 2024-ի հուլիսին նոր ղեկավարությունը սկսել էր թիմի վերակառուցումը։ Չնայած մի շարք խնդիրներին, հաջողվել է ձևավորել մրցունակ կազմ՝ կենտրոնանալով երիտասարդ հայ ֆուտբոլիստների զարգացման վրա։ Ամեն խաղում մեկնարկային կազմում ընդգրկված էր 5-ից 8 տեղացի խաղացող։

Ակումբը առանձնացրել է մի շարք ֆուտբոլիստների առաջընթացը, որոնց թվում են Հայաստանի Մ-21 հավաքական հրավիրված պաշտպաններ Ավենտիս Ավենտիսյանը, Արմեն Սարգսյանը և կիսապաշտպան Արթուր Իսրայելյանը, ով մրցաշրջանը անցկացրել էր «Վեստ Արմենիայում»՝ վարձավճարով։

Առաջընթաց են գրանցել նաև Վահրամ Մախսուդյանը, Էրիկ Սմբատյանը, դարպասապահ Մխիթար Ումրեյանը։ Կանոնավոր խաղաժամանակ են ստացել Տիգրան Այունցը, Դավիթ Պետրոսյանը, Էրիկ Լյանսբերգը և այլք։

Ծանր վնասվածքներից հետո թիմին են միացել Արամ Քոչարյանը և Մարտին Գրիգորյանը, ովքեր իրենց փորձով աջակցել են երիտասարդներին՝ գլխավոր մարզիչ Պատրիկ Պապյանի ղեկավարությամբ՝ միասին կազմելով հավասարակշռված և մարտունակ թիմ։

Ակումբը շնորհակալություն է հայտնել ֆուտբոլային հանրությանը աջակցության և արդար մրցակցության համար՝ եզրափակելով.

«Շնորհակալություն արժանի պայքարի և համագործակցության համար։ Կհանդիպենք խաղադաշտում»։