Դուբայում տեղի կունենա IBA-ի բռնցքամարտի աշխարհի առաջնությունը՝ ռեկորդային մրցանակային ֆոնդով

Միջազգային բռնցքամարտի ասոցիացիան (IBA) հայտարարեց մեծահասակների աշխարհի առաջնության անցկացման մասին, որը կկայանա 2025 թվականի դեկտեմբերի 2-13-ը Դուբայում։ Տոնական «Բռնցքամարտի փառատոնի» մաս կազմող այս մրցաշարը կհամախմբի աշխարհի լավագույն մարզիկներին։

Առաջնության գլխավոր նորությունը ռեկորդային մրցանակային ֆոնդն է՝ 8 միլիոն դոլար։ Յուրաքանչյուր քաշային կարգի հաղթողը կստանա 300 հազար դոլար, արծաթե մեդալակիրը՝ 150 հազար, բրոնզե մեդալակիրները՝ 75 հազար-ական, իսկ հինգերորդ տեղը կարժևորվի 10 հազար դոլարով։ Մրցանակային գումարները կբաժանվեն մարզիկի (50%), մարզչի (25%) և ազգային ֆեդերացիայի (25%) միջև։

IBA-ի նախագահ Ումար Կրեմլյովը ընդգծեց, որ առաջնությունը կլինի ոչ միայն պատմության մեջ ամենամեծը մրցանակային ֆոնդի տեսակետից, այլև իսկական բռնցքամարտի տոն.

«Այս մրցաշարը վերաբերում է արդարությանը, հարգանքին և նոր հնարավորություններին։ Դեկտեմբերին Դուբայը կդառնա համաշխարհային բռնցքամարտի մայրաքաղաքը»։

IBA-ի քարտուղար Քրիս Ռոբերթսն ավելացրեց, որ առաջնության հետ միասին կանցկացվեն նաև մի շարք կարևոր միջոցառումներ՝ IBA-ի կոնգրես, պրոֆեսիոնալ մենամարտեր և Գլոբալ բռնցքամարտի ֆորում։

Սպասվում է, որ առաջնությանը կմասնակցի նաև Հայաստանի հավաքականը։ Հիշեցնենք, որ սեպտեմբերին Լիվերպուլում անցկացվեց աշխարհի առաջնությունը World Boxing-ի հովանու ներքո, որտեղ Հայաստանը չէր ներկայացված։ Ներկայում World Boxing-ը պատասխանատու է օլիմպիական որակավորման համար, իսկ IBA-ն շարունակում է կազմակերպել իր հեղինակավոր մրցաշարերը։