Ուսման Դեմբելեն ճանաչվեց «Ոսկե գնդակ»-2025-ի դափնեկիր

Փարիզի «ՊՍԺ»-ի ֆրանսիացի հարձակվող Ուսման Դեմբելեն ճանաչվել է 2025 թվականի «Ոսկե գնդակի» մրցանակի դափնեկիր։ 28-ամյա ֆորվարդը քվեարկության արդյունքում առաջ անցավ Լամին Յամալից և իր ակումբի գործընկեր Վիտինյայից՝ ավարտելով իր կարիերայի լավագույն սեզոններից մեկը։

Դեմբելեն դարձավ առանցքային գործոն ՊՍԺ-ի պատմական հաջողության մեջ․ փարիզյան ակումբը առաջին անգամ նվաճեց Չեմպիոնների լիգայի գավաթը, իսկ ֆուտբոլիստը ճանաչվեց մրցաշարի լավագույն խաղացող։ Բացի այդ, նա օգնեց թիմին գրանցել «ոսկե դուբլ» Ֆրանսիայում՝ սեզոնը ավարտելով տպավորիչ վիճակագրությամբ՝ 37 գոլ և 15 գոլային փոխանցում։

Տոնական հանդիսության ընթացքում Ֆրանսիայի մայրաքաղաքում շնորհվեցին նաև այլ պարգևներ․

• Ռայմոն Կոպայի մրցանակ (լավագույն երիտասարդ խաղացող) — Լամին Յամալ («Բարսելոնա»),

• Յաշինի մրցանակ (լավագույն դարպասապահ) — Ջանլուիջի Դոննարումա (ՊՍԺ),

• Յոհան Կրույֆի մրցանակ (լավագույն մարզիչ) — Լուիս Էնրիկե (ՊՍԺ և Իսպանիայի հավաքական),

• Գերդ Մյուլլերի մրցանակ (լավագույն ռմբարկու) — Վիկտոր Յոկերեշ (63 գոլ «Սպորտինգի» և Շվեդիայի հավաքականի կազմում, այժմ՝ «Արսենալ»):

Կանանց մրցանակը երրորդ տարին անընդմեջ շահեց Այտանա Բոնմատին («Բարսելոնա»)։

Տոպ-10 տղամարդկանց «Ոսկե գնդակ»-2025-ի վարկանիշում․

1. Ուսման Դեմբеле (Ֆրանսիա, «ՊՍԺ»)

2. Լամին Յամալ (Իսպանիա, «Բարսելոնա»)

3. Վիտինյա (Պորտուգալիա, «ՊՍԺ»)

4. Մոհամեդ Սալահ (Եգիպտոս, «Լիվերպուլ»)

5. Ռաֆինյա (Բրազիլիա, «Բարսելոնա»)

6. Աշրաֆ Հակիմի (Մարոկկո, «ՊՍԺ»)

7. Կիլիան Մբապպե (Ֆրանսիա, «Ռեալ Մադրիդ»)

8. Քոուլ Փալմեր (Անգլիա, «Չելսի»)

9. Ջանլուիջի Դոննարումա (Իտալիա, «ՊՍԺ»)

10. Նունու Մենդեշ (Պորտուգալիա, «ՊՍԺ»):

Հատուկ մրցանակներ ստացան նաև «Արսենալի» կանանց թիմը (տարվա լավագույն ակումբ), անգլիացի մարզիչ Սարինա Վիգմանը և իսպանական Fundación Xana հիմնադրամը, որը պարգևատրվեց Սոկրատեսի մրցանակով։

69-րդ «Ոսկե գնդակի» հանձնման արարողությունը կայացավ սեպտեմբերի 22-ին՝ Փարիզի «Շատլե» թատրոնում։ 1956 թվականից ի վեր այս մրցանակը, որը հիմնել է France Football ամսագիրը, մնում է համաշխարհային ֆուտբոլի ամենահեղինակավոր անհատական պարգևը։